MPCC in auhla letling-a kal ah sawrkar puh

Mizoram Pradesh Congress Committee (MPCC) media Department chuan nimin khan Aizawl Press Club-ah thuthar thehdarhtute kawmin ZPM chu an auhla letling chiahin an kal tih an sawi a. “ZPM sawrkar hian auhla berah ‘Kalphung thar, Mipui sawrkar’ tih an hmang a, he an auhla hi an theihnghilh ta nge ni, an auhla letling chiahin an kal chho ta zel a ni,” an ti a. “Inrenchem an aupui a, chutih lai chuan sawrkar ruangam an ti lian a, CM Adviser an ruat teuh a, Board Chairman atan MLA nilo an ruat bakah an hlawh an tipung bawk a, heng te hi an kalphung thar hmuh theih chu a ni mai in a lang. Heng bakah hian Consultant te, Secretary level te sawrkarah an ruat belh teuh a, heng mite hian Office hran an nei leh bawk a, inrenchem lam an hawi lo hle. An inrenchem ve na chu mipui an hrek a, chhiah an tipung a, buhfai man an ti pung bawk,” an ti a ni.