BJP in Delhi Assembly a hnehna chan an lawm

BJP Mizoram chuan nimin khan Aizawl-a an party Office-ah kar thar inhlanna leh Delhi Legislative Assembly Election, 2025-a BJP-in hnehna a chan lawmna hun an hmang a, he huna thu sawitu BJP State Core Group Member Dr. K. Beichhua MLA chuan Delhi ah sawrkarna a zawna term hnih (2) AAP-in an lak hnuah BJP chuan hneh takin Sawrkarna an la thei tih sawiin, “Mipuiin BJP ah rinna an nghat nasa hle a ni tih Result kan hmuh atang hian a lang chiang hle a ni,” a ti a. Mizoram chungchang sawiin, “Kan State Sawrkar chu rethei leh harsa tak nimah ila, BJP thawhpui an hreh avangin sum puk tur zawngin an phi ruai a, thlatin mai Sum an puk ta tlauh tlauh mai a ni. Mipui a an in zawrhna an thutiam an ti hlawhtling hleithei lova, kumin 2025 February 20, Mizoram State Day VC/LC inthlan zawh ah pawh Sawhthing kan lei ang an ti a, chhuanlam dang an siam leh dawn nge, an intiam angin an lei sak dawn tih chu kan lo thlir dawn a ni,” a ti.