MNF in Zoram kan kaihhruai chhung khan tih fuh tawk lote a awm ngei ang - Dr. R. Lalthangliana
MNF Senior Vice President Dr. R. Lalthangliana chuan MNF in Zoram an kaihhruai chhung khan tih fuh tawk lo te a awm ngei ang tih sawiin, MNF a sawrkar leh chuan District Council Area-a an hnathawh dan chu tih danglam ngei a ngai tih hi an hriat thu a sawi bawk.
Kumthar 2025 atana Siaha District MNF Party Office hawnna hun nimin-a neih a hmanpuina ah MNF Sr. Vice President Dr. R. Lalthang-liana chuan MNF sawrkar khan Zoram hmasawn nan theihtawp an chhuah thu sawiin, “Kan CM zahawm tak ni thin Pu Zoramthanga khan ngaihtuahna zawng zawng sengin Zoram hmasawnna a ngaihtuah a, a bei thin. Engemaw hleka sawi hnawmna tur zawng awm thin mahse; MNF Ministry Pu Zoramthanga hruai khan rilru leh tihtak zetin hna a thawk a ni tih hi Zoram mipui hnenah ka sawi nawn leh duh a ni,” a ti a. MNF in Zoram an kaihhruai chhung khan tihfuh tawk lo te a awm ngei ang tih sawiin, “A bikin District Councils Area kan enkawl dan pawh hi duhthu a sam hauh lo tih kan pawm. Tunah chuan ngaihtuahna thar nen rilru tharin MNF a sawrkar leh chuan District Council area a kan hnathawh dan hi chu tihdanglam ngei a ngai tih hi kan hria. India Constitution hnuaia Sixth Schedule hnuaia sawrkarte Autonomous District Council hi en hniam emaw, ngaihthah chi emaw a ni lo tih hi kan hriat thar a ngai a ni,” a ti bawk.
Sawrkar kan hrawn mek chuan Opposition an nih lai khan Mizoram sawrkar lo kaihruai tawhtute chu archuktui loin an chhuah vek tih pawh MNF Sr. Vice President chuan sawiin, “Engmah tih ve nei lo, nuam tawl satliah mai mai ah an chhuah vek thin. Zoram mipuiah beisei tharna ‘Kalphung thar’ an tiam a, an duhthusam apiang chu duang chhuakin mipuiah an inzuar a, chu kalphung thar chu Zoram mipuiin kan lei ta,” tiin sawrkar chu mipui beisei ang a nih loh thu leh Zoram mipuiin sawrkar kaihruai a harzia an hriat thar nan Zoram mipui min zirtir nan chung lamin min pe tia pawm mai tur a nih thu a sawi a. Mipuiin MNF sawrkar thar an la pek leh thuai a beisei thu leh an sawrkar chhunga an tih dikloh zawng zawngah ngaihdam a dil thu a sawi bawk.
Comments
Post a Comment