An tih thin ang ti ve turin an duh lo niin sawi

Home Minister K. Sapdanga chuan sawrkarna lo chelh tawh ten Sawrkar thar chu an lo tih thin dan anga ti ve tura an duh loh thu a sawi.

    Nimin-a ZPM in Chhung Inkhawm an neih ah Home Minister K. Sapdanga chuan ZPM Sawrkar chuan kum khat emaw chauh Sawrkarna an la chelh chungin Zoram mipuiten an chungah beiseina dang tak an nei nia sawiin, “Mipui an duhtui em em a, Eptu Party te phei hi chu van atanga lo chhuk ang mai an ni a, sual laka fihlim tur hian min beisei a ni ber a, an hun laia thiltha an tih theih loh zawng zawng kha ti thei turin min beisei mai ni lovin Sawrkarna an chelh laia an lo tih thin anga ti ve turin min duh lo a ni. Hetiang Eptu Party kan nei hi vannei kan in ti tak zet a ni,” a ti. Halpuah leh Halmawi khapna chungchangah Home Minister chuan Sawrkar thuchhuak bawhchhia thubuai 52 ziahluh a nih thu leh hei hian mi 60 hmer telin Court in an chungthu a rel dawn tih a sawi a. Dan lova kuhva tawlhruk chungchang ah Police te thawkrim hle tih pawh sawiin, “Tunah hian Police Duty te helna hi Kawngruk 29 a awm a, heng kawngruk te hi Sawrkar hmasa atanga kan rochun a ni. Kawng tam takah chuan tlawmngai pawl te leh VC te Sawrkar venpuia tlaivar a Duty te pawh an awm a ni. Hetihlai hian Smugling Kuhva tawlhru te thurualpuia lo tanpui zawk VC te an awm tih kan hria a. Heng VC te avang hian VC inthlan hi kan nghakhlel em em a ni. Inthlan zawh lamah chuan Kuhva tawlhruk pawh hi a tlahniam sawtin kan ring a ni. Chutiang zelin kan ram siamthat hna thawhna kawng hrangah chak zawka hma kan lak theih nan mipuite pawhin rilru leh ngaihtuahna fim tak hmang turin kan ngen a ni,” a ti bawk.