MLP ten Lengpui Airport hralh changchang sawrkar in ngaihtuah nawn leh se an ti

MNF Legislature Party chuan Inrinni khan Lengpui Airport chu tlawhin Airport Runway dinhmun te an enfiah bakah thsawktute nen an inkawm a, Lengpui Airport hralh chu Mizo mipui tam tak duhloh anih avangin Sawrkar chu in ngaihtuah nawn se an tih thu an sawi a ni.

MNF Legislature Party te hian Inrinni khan an hruaitu Lalchhandama Ralte hova Lengpui Airport hi tlawhin Lengpui Airport hotute an kawm a, he hunah hian MLP hruaitu Lalchhandama Ralte chuan Mizoram Sawrkar in Lengpui Airport chu Indian Air Foece (IAF) kuta a hlan chuan ram pawi a khawih dawn tih sawiin, Mizoram Airport neih chhun IAF kuta hlan chu eptu party hrang hrang leh tlawmngai pawl bakah Mizo mipui tam takin an duh lo niin a sawi a, ZPM in kum khat pawh an la enkawl tlin hmaa hralh an tum chu hriatthiam harsa a tih thu a sawi bawk. Lalchhandama Ralte chuan ZPM in sawrkarna an chan atanga an hmalakna hmasa berah Lengpui Airport chu midang kuta hlan an rel nghal tih pawh sawiin, “Chief Minister Pu Lalduhoma’n Delhi a kal hmasak bera a lo haw ah Lengpui Airport chu AAI hnenah emaw, Adani Group-ah hlan tum a ni ang tiin a sawi bawk a, hemi bawhzui hian sawrkar chuan Committee te dinin he Committee in rawtna a neih angin Cabinet chuan Indian Airforce hnena hlan turin MoU duangtu tur Committee an siam,” a ti a, IAF kuta Airport hlan anih chuan mipui zalenna a bo dawn niin a sawi bawk.

Lengpui Airport atan hian Chief Minister lo ni tawh ten kum 25 chhung theihtawp an lo chhuah tawh thu Lalchhandama Ralte chuan sawiin, ZPM sawrkar in kum khat awrh an enkawl hman tiha hralh an tum ta mai chu hriatthiam har a tih thu a sawi bawk a ni.

MNF Vice President chuan an sawrkar lai khan tuna runway sirah hian runway dang siam tumin hma an la tih pawh sawiin, tuna mi ai hian a thui theih zawk tih PWD Engineer te pawhin an finfiah thlap tih a sawi a. Central lamah pawh DPR thehluh a ni tawh thu leh he runway hi puitlin a nih chuan International Airport neih te pawh beisei a nih laia IAF te pek tum a nih chu a hrialh-hai thlak a tih thu a sawi bawk.