LADC-a MNF leh Congress sawrkar fiah dawn

Lai Autonomous District Council (LADC)-ah ZPM-in sawrkar ding lai an lehthal thei dawn-a a lan avangin tunkar Nilaini khian Chief Executive Member (CEM) C. Lalmuanthanga kaihhruai Congress leh MNF sawrkar intawm chu thlawptu a ngah tawk em tih fiah a ni dawn.

Larsap Gen. Vijay Kumar Singh remtihna-in District Council & Minority Affairs Department Secretary Sangchhin Chinzah chuan LADC Chairman V.L. Hmuaka hnenah lehkha thawnin tunkar Nilaini, February ni 12 khian sawrkar dinglai buk tura LADC inkhawm hmanhmawh ko turin a ngen a, sawrkar dinglai buk a nih hma chuan sawrkar hnathawk lak leh sawn lo turin LADC sorkar chu a hriattir bawk.

Lawngtlai atanga thudawn danin a hma lam khan MNF MDC 12 leh Congress MDC neih chhun C. Lalmuanthanga te chuan CEM atana ruat C. Lalmuanthanga kaihhruaiin MDC 25 awmna LADC-ah hian nikum May ni 14 khan sawrkarna an siam a. May ni 17 khan Council inkhawm ah fiahna a paltlang a. ZPM chuan MDC 10 neiin tunhnai khan BJP MDC awmchhun T. Zakunga’n ZPM hi a zawm a. A hnu lawkah MNF MDC pahnih - CEM hlui V. Zirsanga leh Lallawmsanga Apeto te'n ZPM an thlawp leh tak bawk avangin ZPM hian thlawptu MDC 13 nei a inchhalin sawrkarna siam an tum ta a ni.

Hemi hma hian LADC-ah hian rei tak sawrkarna awm mumal thei lova a awm avangin thla khat leh a chanve zet chu Larsap awpna hnuai (governor's rule)-ah awmin Lawngtlai District Bawrhsap in Larsap aiawhin sawrkarna a keng a, chumi hnuah MNF leh Congress-in sawrkar intawm siamin kum khat pawh a tlin hmain fiahna neih a ni leh dawn ta a ni.