Dan lova kuhva rah phurh thahnem tak man a ni

Mizoram Police te chuan nimin leh niminpiah khan Mizoram-ah dan lova kuhva phurh nia hriat thahnem tak an man.

Niminpiah khan Champhai Police Patrolling Team te chuan Motor pahnih atangin kuhva rah ro an man a, kuhva rah bag 40 chu Lalsangliana, Champhai Ruantlang nia inchhal khalh atanga manin bag 35 chu C. Vanlalhmingliana, Champhai Zote nia inchhal khalh atangin man a ni bawk a, bag khat-ah hian kg. 80 zel awmin a vaiin Rs. 18,00,000/- hu nia chhut a ni.

Nimin zing dar 7:00 vel khan Champhai Police te chuan Tuipui khaw dai-ah motot 5 atangin kuhva rah ro bag 730 an man leh bawk a, Lalrinawma, Tualte nia inchhal khalh Motor atangin bag 140; Lalrinmawia, Kawlkulh khua nia inchhal khalh atangin bag 140; Lalrinchhana, Champhai Electric nia inchhal khalh atangin bag 50; Ramneihthanga, Bilkhawthir nia inchhal khalh atangin bag 140 leh Lalremthanga, Champhai Bethel nia insawi khalh atangin bag 160 te man a ni a, bag khat hi kg, 80 zela rit ni bawkin kg. khat hi Rs. 300/- man nia chhut a ni a, Dan anga phalna an neih loh avangin Myanmar atanga rawn tawlh ni ngeia hriat a ni.

Vairengte Police Patrolling te chuan nimin zing khan Vairengte leh Chhimluang khaw inkarah lirthei pahnih atangin kuhva rah bag 140 ve ve an man bawk a, heng lirthei khalhtute hi Jovrul Islam, Karimganj leh Karim Uddin, Bagha nia inchhal te an ni bawk.

Hetihlai hian Tuipuiral Group YMA chuan niminpiah khan thuchuah siamin Tuipuiral huamchhungah Kuhva phur motor a tlan thin chu an duhloh thu an sawi a, dan lova kuhva rah phurh chu Sawrkar leh Central YMA phalloh thil a ni tih sawiin, Tuipuiral huamchhunga kawng hmang tawhlo tura an duh thu leh thuchhuah zawmlo an awm anih chuan thu neitu sang zawka hlan emaw, an chunga na taka action lak an tum tih an sawi a ni.