Mizoram Lokayukta Fifth Annual Report thehlut

Mizoram Lokayukta chuan nimin khan Governor Gen. (Dr) Vijay Kumar Singh-a hnenah Mizoram Lokayukta Fifth Annual Report 2023-2024 chu an hlan.

Mizoram Lokayukta Act, 2014 chhunga Section 47 in a phut angin Mizoram Lokayukta Chairperson Lalmalsawma chuan Mizoram Lokayukta Fifth Annual Report 2023-2024 hi Governor hnenah hian a hlan a, Annual report hian April ni 1, 2023 leh March ni 31, 2024 inkar a huam a, Mizoram Legislative Assembly-ah pharh a ni dawn a ni. Raj Bhavan-a Mizoram Lokayukta Fifth Annual Report 2023-2024 hlanna hunah hian Governor chuan Mizoram Lokayukta Chairperson Lalmalsawma bakah hian Lalsanglura, Member leh Joel Joseph Denga, Member (Judicial) te chu an hmalakna hrang hrangte sawipuiin, Chairperson-in Mizoram Lokayukta dinhmun leh hmalakna tlangpui a tarlang a. Mizoram Lokayukta hnuaia case neih dan leh bawhzui dante bakah dinhmun leh thlen chinte Governor hi an hrilh bawk a ni.

Annual report-in a tarlan dan chuan kum 2023-2024 chhung khan Mizoram Lokayukta hnuaiah eirukna thubuai case 8 ziahluh a ni a, heng te hi Preliminary Inquiry tura tih niin heng zinga case 7 te Report hi dawn tawh a ni. March 2019-a Mizoram Lokayukta din a nih atanga February ni 10, 2025 thleng khan Mizoram Lokayukta hnuaiah case 71 ziahluh tawh niin, heng zinga case 46 te hi chhuizui tlaka ngaih a ni a. Case hearing tum 38 neih tawh a ni a, thiamloh chantir 4 leh thiam chantir pakhat an awm tawh a. Department proceeding tura tih case 3 a awm tawh bawk.