Lianchhiari Rûn Mini Theatre thar hawn a ni

Zonuna Kawlni (LENKAWL) • February 5, 2025 • Comments • Mizoram

Aizawl-a Information & Public Relation Department Building thar, Lianchhiari Rûn-a Mini Theatre bun thar chu nimin khan I&PR Secretary Betsy Zothanpari Sailo chuan a hawng.

I&PR Secretary chuan Lianchhiari Rûn-a Mini Theatre buatsaih hawn theiha peihfel a ni chu lawmawm a tih thu sawiin, lemchan lama tuimite hmasawnna tura chhenfakawm tak a ni tih a sawi a. Tunhnai ah Mizoram in film siam kawngah nasa taka hma a sawn leh mipuite'n an hlut chho zel chu lawmawm a tih thu sawiin, Film tihhmasawn nana apps siam a ni leh film tihhmasawn kawnga Sawrkarin theihtawp chhuah a inhuam chu thil lawmawm tak nia a hriat thu a sawi bawk.

Lianchhiari Rûn-a Mini Theatre hawnna hun hi I&PR Director C.Lalnunkima chuan kaihruaiin Pratap Chhetri, Deputy Director & Nodal Officer, Visual Art chuan Mini Theatre din chhoh dan leh hmalak zel dan tur report a. He Mini Theatre hi mi 100 len theihna tura ruahman niin Laser projector leh bungraw changkang tak taktea thuam a ni a, film siamtute pawhin I&PR Department-ah dilna thlenin hman theih a ni ang.