Larsap in AR hmun a tlawh

Zonuna Kawlni (LENKAWL) • February 7, 2025 • Comments • Mizoram

Mizoram Larsap Gen (Dr) Vijay Kumar Singh chuan nimin khan Aizawl Khatla-a 23 Sector Assam Rifles Headquarters chu tlawhin Assam Rifles hotute a kawm a, India leh Myanmar ramri vengtu Assam Rifle-te hmalakna fakawm a tih thu sawiin, India ram leh a chhunga chengte himna tura theihtawp chhuah chhunzawm zel turin a chah a. Dan lova ramri kaltlanga chetna ven kawngah tanlak a tul thu sawiin, mipuite rawngbawl hna thawh pawh ngaipawimawh zel turin a chah bawk.

He hunah hian Larsap hi Guard of Honour pek niin Brig Girish Upadhya, DIG HQ 23 Sector leh a thawhpuite'n an lo dawngsawng a. Mizorama Assam Rifle hmalakna leh pawimawh hrang hrangte PowerPoint Presentation hmangin an lo hrilhfiah a ni. Assam Rifle-te hian Mizoram bikah India leh Myanmar ramri km 510 vela thui ven hna an thawk mek a, an hnuaiah hian Battalion pathum awmin Company Operating Base (COB) 6 theuh an nei a ni.