Inter-State Youth Exchange Programme hman a ni

Nehru Yuva Kendra Sangathan (NYKS) hnuaia Meghalaya leh Mizoram State thalaite intlawh-tawnna, Inter-State Youth Exchange Progamme hawnna chu nimin khan Lunglei Zotlang-a Tourist Lodge Conference Hall-ah hman a ni.

Meghalaya-Mizoram YEP-ah hian Meghalaya atangin Team Leader pahnih hovin thalai 25 an lo kal a. NYK Lunglei chu a thlengtu niin February ni 6 atanga 10, 2025 chhungin Mizoram-a YEP hun hi hman a ni dawn a. Hemi chhung hian Meghalaya atanga thalai lo kalte hi Mizoram leh Mizote chanchin, nunphung, hnam ziarang leh thil pawimawh hrang hrang zirpui an nih bakah, Lunglei leh a chhehvela pisa leh hmun pawimawhte fanpui an ni dawn a. Mizo in mikhual dan leh Mizo ei leh in te an hriatthiam theih nan YMA Zotlang Branch te'n lo mikhualin hun an hmanpui dawn a. Hnatlang bakah, Mizo tawng, hla leh lam zir hona te buatsaih thin a ni bawk ang.

Meghalaya-Mizoram Youth Exchange Programme hi Deputy Inspector General of Police (Southern Range) Altaf Ahmad Khan chuan a hawng a, thalaite chu ram hmasawnna kawnga a lailum luahtu leh hmanraw pawimawh ber an nih thu sawiin, thalaite theihna leh thiamna ramin a hman tangkai thiam danah ram hmasawnna chu thui tak a innghat tih a sawi a. Thalaite'n rilru put hmang dik an neih theih nana NYK hmalakna chu fakawm a tih thu sawiin, thalai kalkhawmte chu YEP kaltlanga thil thar zirchhuah tum tur te, ruihhlo laka inthiarfihlim tur leh mi dangte tanpui leh zirtirtu ni zel tur te'n a fuih a ni. He hun hi NYK Mizoram State Director Mercy Sellate chuan kaihruaiin thusawi hrang hrang ngaihthlak a ni bawk.

He ruahmanna hnuaiah hian February ni 17-21, 2025 chhungin Mizoram atanga thalai thlan-chhuahte'n Meghalaya tlawhin, Inter-State YEP hun hi hman chhunzawm a ni ang.