DIG (NR) in SP Office tlawh

Mizoram Police Northern Range-a DIG C. Lalthanmawia IPS chuan nimin khan Mamit SP Office tlawhin thawktute a kawm bakah Mamit a chanchinbu mite a kawm bawk a, Police hna chu hna pawimawh tak a nih thu sawiin, dan keng-kawhtu an nihna angin entawntlak a hnathawk turin a chah a. An hnathawhna hmun chu an rawng-bawlna pulpit a nih angin rintlak leh theihtawp chhuah a an thawh chu an tih tur niin hmasawnna lam kawng zawh a thawh a tul thu a sawi bawk. DIG Northern Range chuan Police chu mahni chauh a ding thei an ni lo tih pawh sawiin, mipui vantlang, tlawmngai pawl leh chanchinbu mite nen thawhhona tha neih a tul thu leh an ni tel lo chuan hmasawnna tak tak a awm theih loh thu a sawi bawk. He hunah hian rukru avanga phone tibo, Police in an man te hnenah Phone pekletna hun hman a ni a, phone pariat an man chu a neitute hnenah pek let niin hemi kawng a hmalatu CEIR Team te hnenah chawimawina hlan an ni bawk.