Kolasib leh Cachar DC leh SP te an inkawm

Kolasib District (Mizoram) leh Cachar District (Assam)-a Deputy Commissioner (DC) leh Superintendent of Police (SP) te chu nimin khan Cachar DC Conference Hall-ah an inkawm.

He inkawmna ah hian Kolasib District atangin Bawrhsap Robert C. Lalhmangaiha leh SP David H. Lalthangliana te telin Cachar District atangin DC Mindal Yadav leh SP N. Mahato te an tel a, heng mi pawimawh te hian a tul anga thawhho dan tur leh inhriatthiam tawnna tha zawk neih theihna atana pawimawh thil chi hrang hrang an sawiho a. Kolasib DC chuan Mizoram in VC inthlan an hmachhawn turah ramri leh a chhehvel ah dan leh thupek kenkawhna lamah a tul anga thawhpui turin a sawm a. In unauna tha zawk a awm theih nan kumin Chapchar Kut lo thleng turah pawh Kolasib a hmanpui turin a sawm nghal a ni.

Heng bakah hian NHIDCL hmalakna a 4 Lane kawngpui laih tur chungchang sawihovin Kolasib-ah Meeting neih nise an ti a, State pahnih ramri hnaih a cheng ten harsatna an tawh loh nan leh thlamuang taka an awm theih nan Minister Level-a inbiakna a Joint Resolution an lo siam tawh chu vawng zel chungin a tul anga thawhdun zel nise an ti bawk. He hunah hian Kolasib SP David H. Lalthangliana pawhin Cachar SP leh a hoten Mizoram Police te kawng hrang hranga an thawhpuina ah lawmthu a sawi a, hun lokal lehzel ah pawh thawhdunpui turin a sawm nghal bawk.

He inkawmna hi August ni 9, 2024-a State pahnih Home Minister ten Assam leh Mizoram ramri ah inpawhna leh thawhhona tha zawk a awm theih nan DC leh SP Level-ah inbiakna neih thin ni rawh se tia thu an dah bawhzuina a ni.