Khapna thupek chhuah thar

Serchhip District Magistrate Paul L. Khuma chuan Section 163 of Bharatiya Nagarik Suraksha Sanhita, 2023 tlawhchhan a Serchhip District-a Ui khuahkhirhna thupek a lo chhuah tawh chu Feb. 10, 2025 khan thla hnih (2) chhung atan a chhuah thar leh.

He khapna thupek hnuaiah hian mi tumahin midangte tana harsatna siam zawng leh midangte tana hnawksakin Ui an vulh tur a nih loh thu te; Ui vulhtuten khawlaiah an Ui te an chhuah zalen tur a nih loh thu leh khawlai a an chhuahpui dawnin hrui/chain rinawm tha taka hlingin an kai ngei tur a nih thu te; Ui vulhtu ten an Ui vulh te tha takin an khuahkhirh tur a nih thu leh Ui khawlaia tla leh a nghawnga hrui/chain-a thlunna awm lo te chu neitu awm lo anga ngaih a ni ang tih te a tarlang a ni.

Hei bakah hian Serchhip District Magistrate chuan Section 163 of Bharatiya Nagarik Suraksha Sanhita, 2023 tlawhchhana Vawk leh Vawksa lakluh khapna thupek a lo siam tawh pawh tun thla ni 11 atanga thla hnih (2) chhung huam turin a chhuah leh bawk a. He thupek ah hian Serchhip District chhungah ram dang (Foreign countries), State dang leh Mizoram chhung District dang atangin Vawk, Vawksa leh Vawksa atanga siam eitur reng reng lakluh khap tlat a nih thu te; Serchhip District chhung khua leh khua-a vawk inlak pawh tur te reng rengin AH&Vety Department a thawk te emaw, khawtlang hruaitu Village Council te hnen atangin ran hrisel ngei anih hriatpuina an la ngei tur a nih thu te; Vawk hrisel tha chauh talh tur a nih thu leh Vawk damlo reng reng talh tura sawngbawl loh tur a nih thu te a tarlang a ni.