CM in State Credit Seminar a hmanpui

Chief Minister Lalduhoma chuan nimin khan NABARD, Mizoram Regional Office buatsaih State Credit Seminar chu a hmanpui.

Mizoram Rural Bank Auditorium, Aizawl-a hun hmanah hian Chief Minister chuan State Focus Paper 2025-26 tlangzarhin State Focus Paper tihchhuahah hian Mizoram State chhunga Agriculture leh thingtlang lama hmasawnna chak taka kalpui zelna tur atana ngaihtuahna thar, rawtna leh tih tur pawimawh tarlan niin a hlawhtlin ngei a beisei thu a sawi a, NABARD hian loneitute chu Agriculture Technology thar hmang tangkaina kawngah te, an thil thar leh siam chhuah zawrchhawn kawngahte, thingtlang lama nunphung a tha zawnga tidanglama tihchangtlunna kawngah te thawktu pawimawh tak anih thu a sawi bawk.

He hunah hian Rural Development Minister Prof. Lalnilawma pawhin thingtlang thalaite thiamna tihhmasawn, Value chain tihhmasawn leh agro-based processing te ang chi hmasawnna kawng hrang hrang hmanga Food Processing Sector tihchangtlun a tul thu a sawi a. Agriculture Minister PC. Vanlalruata pawhin NABARD leh Banking Sector ten State chhunga Agriculture Development leh Financial Inclusion kawnga an thawhna ah lawmthu a sawi a. NABARD-in a sanctioned tawh Rural Infrastructure Project-te chu chak leh rang taka kalpui a nih theih nan hma an lak thu pawh a sawi bawk. Nimin-a he hun hman ah hian Chief Secretary Khilli Ram Meena leh Reserve Bank of India General Manager (OIC) T. Lhungdim-te pawh telin Bankers te, Agriculture, Horticulture, Industries, PWD, P&ED aiaawh mi pawimawh te leh, Cooperative Agencies, MzSRLM , NGO hrang hrang te an tel bawk a ni.