Chief Minister in Doctor te chu ram tana hlawk taka hna thawk tura beisei an nih thu a sawi

Chief Minister Lalduhoma chuan Doctor te chu ram tana hlawk taka hna thawk tura beisei an nih thu a sawi.

Mizoram Govt. Doctor Association (MGDA) Annual General Conference vawi 39-na nimin a Aijal Club-a neih a hmanpuina ah Chief Minister Lalduhoma chuan Doctor te chu khawvel hmun tinah kan zahin kan ngaisang vek tih sawiin, “Midangte tanpui nana hna tha bik hi thlang dawn ila Doctor hna hi a hmasa pawl a ni hial ang,” a ti a. Ram hmasawn nan mipuite hriselna a pawimawh avangin sawrkar chuan damdawi In te, Centre te a din a, a vil turin Doctor leh thawktu dangte a la tih sawiin, “Mipuite an hrisel theih nan nangmahni ah sawrkarin investment a kalpui tihna a ni. Investment reng reng chu a lo kir leh tur hisapa neih zel a ni a. Kan Doctor te pawh hi ram tana hlawk taka hna thawk tura kan beisei te in ni,” a ti.

Doctor te tangkaizia leh an hlutzia chu ramin harsatna a tawh ni ah te, mimal leh chhungkua in vanduaina kan tawh ni ah te a lo lang fiah thin tih Chief Minister chuan sawiin, “Covid hripuiin min chim lai khan hri kai huamin damlote in enkawl a nih kha. In hnathawhah kan lawm a, chhunzawm zel turin ka ngen che u a ni,” a ti a. Tunhnaiah sawrkar Doctor leh damdawi In duhkhawp lohna thawm kan hre leh zauh thin tih pawh sawiin, “Thawktute inthlahdahna vanga lo thleng ta nia lang thilah te phei chuan ngaihtuahna a kal thui thin. Geneva Declaration of World Medical Council leh Code of Medical Ethics Regulation 2002 hmanga ven in ni a. Damlote enkawlna kawngah hian tisual thei turah pawh kan ngai lo che u a ni,” tiin Tu ten emaw dik tawk lo deuha an puhna ang chiah phei chuan a sawifiahna press release siam ve thuai zel pawh a tha awm e tih a sawi bawk.

An sawrkar tirh ah Health Care Bill tang cheng vbc. 50 vel zet an pe chhuak nghal tih pawh Chief Minister chuan sawiin, tun thlenga MR Bill an pekchhuah tawh chu cheng vbc. 90. 28 a tling tawh tih a sawi a, “Health Care Bill hi dan ang thlapin kan thawktute an endik zel a. Tun sawrkar kum kal mekah hian dik taka hna an thawh zarah cheng vbc. 14 zet an hum (save) tawh nghe nghe. Sawrkar hnathawk leh Hospital lam te hian dik takin bill hi thehlut thin ila a duhawm khawp mai. Kan natna dik tak aia uar zawk emaw, kan inenkawlna senso dik tak aia sang zawk fe a bill kan han thehlut duh tlat mai hi Pathian hian mal a sawmin ka ring lo,” a ti a. Sawrkar hnathawk te chu an theih ang tawkin an duat tih pawh sawiin, “Kan sawrkar ve hnu December 2023 atanga January 2025 thleng khan sawrkar hnathawkte GPF hi cheng vbc. 782 kan pechhuak tawh a. Pension charge atan ringawt pawh hian vbc. 1278 kan pe chhuak tawh,” a ti bawk.