Central YMA in Ruihhlo Do infuihtharna hun hmang

Central YMA buatsaihin Zirtawpni zan khan 'Ruihhlo Do infuih-tharna hun' chu Aizawl-a Vanapa Hall-ah neih a ni a, he huna kalkhawm te hian Indian Air Force kuta Lengpui Airport hlan remtih loh thu resolution siamin an pawm a ni.

Nikum October 24-a YMA Rorel Inkhawm vawi 4-na R. Dengthuama Hall a neihin, ‘Ruihhlo Dona khawngah nasa zawk a hmalak ni rawh se’ ti a a lo rel tawh angin 'Ruihhlo Do infuihtharna hun' hi hman a ni a, he hun hi Central YMA Vice President Prof. Lalnuntluanga chuan kaihruaiin Central YMA President Lalhmachhuana chuan ruihhlo do turin YMA hruaitu leh member te, nu leh pa, Kohhranho te thahnemngai taka penchhuak tur leh ruihhlo do pui turin a sawm a ni.

He hunah hian YMA Branch 109 atangin Branch hruaitute leh Branch YMA hrang hrang a kumpuan Sub-Committee mi 900 vel a kalkhawm a, Central YMA President lo ni tawh pathum- J.H. Zoremthanga, Lalbiakzuala leh Vanlalruata-te bakah Central YMA President Lalhmachhuana te hnen atangin Ruihhlo Do na nasa zual zawka kalpui na tur kawnga hmalakna tur kawng hrang hrang ngaihthlak a ni a. Kalkhawmte atangin zawhna leh chhanna hun hman a ni bawk.

He huna kalkhawmte chuan Resolution pahnih- 'Kan ram rohlu, Lengpui Airport hi Indian Air Force ( IAF) kutah hlan anih lohna tura Central YMA leh NGO Coordination Committee in hma a lakna hi kan thlawp a, Indian Air Force kuta Lengpui Airport hlan hi kan rem ti lo a ni,' tih leh 'Aizawl khawpui lailia awm mek Assam Rifles-te a chhuah hunah an awmna hmun, Lammual leh a chhehvel hi mipui vantlang tana tangkai taka hman anih theih nan leh mimal, Pawl, Political Party leh Kohhran ten remchang la lo tura Central YMA hmalakna hi kan thlawp a; theihtawp chhuaha hmalak zel tha kan ti,' tih chu an pawm a ni.