Sawrkar hnathawk pawl, mahni hamthatna tura na taka sawrkar nawr ching awm kan remti lo - Chief Minister

Chief Minister Lalduhoma chuan Sawrkar hnathawk pawl thenkhat, mahni pawl hamthatna tur dapa nasa taka sawrkar nawr ching an awm an rem ti lo tih sawiin, Sawrkar damdawi In-a engemaw chetsualna te, vanduaina te a lo thlenin thil chinchang dik tak mipuite hrilh hriat ran zel a that thu a sawi bawk.

Health Department leh Social Welfare & Tribal Affairs Department te hnathawh dan thlirletna (Review Meeting) nimin-a Secretariat Conference Hall-a neih a hmanpuina ah Chief Minister Lalduhoma chuan Sawrkar thuruk vawn kawngah dan zawm tur an nih thu sawiin, sawrkar hnathawk pawl thenkhat, mahni pawl hamthatna tur dapa nasa taka sawrkar nawr ching an awm an rem ti lo tih sawiin, “Dan a ni lo,” a ti a. Service rivalry nasa lutuk te chu tha an ti lo tih sawiin, “Duhsak bik kan nei lova, ram tana tha chu kan ti zel dawn,” a ti. Chief Minister chuan hnathawktu (contractor) muan leh thawh chhiat vanga harsatna tibo tur leh Project pending nei lo zawnga kal an duh thu sawiin, a tul a nih chuan contract tihtawp thlenga kal ngam mai nise a ti a, “Contract Agreement fel lo vangin sawrkar hi a chan chhe zawkah a tang ngar ngar zel a. Hnathawh chhia, mipuite an phun mur murna ah ngei pawh contractor kan hrem ngam lo fo. A pawisa petu (a leitu) a nih angin sawrkar chan tha zawk tura Contract Agreement ziah zel theih tha kan ti,” tiin Sawrkar bungrua leh hmanruate tlawm zawka lei theihna tur dan an ngaihtuah mek tih a sawi bawk.

Chief Minister chuan Kalphung thara kal chho zel an nih thu pawh he hunah hian sawiin, “Kan kalphung thar hian in lo kal dan tawh sa kha a rawn nek fo dawn a. Inthlakthleng ngam Department ni vek turin Department zawng zawngte ka chah a ni,” a ti a. “Hma kan lakna turah 'a theih loh dan' lo dap lova, a theih dan lo dap hram hram zawk turin kan beisei che u,” a ti a. “Sawrkar damdawi In-a engemaw chetsualna te, vanduaina te a lo thlenin thil chinchang dik tak mipuite hrilh hriat ran zel a tha a. A phenah thil tisualtu an lo awm phei chuan dan anga hmalak mai pawh hreh lutuk lovang u,” a ti a. Department te chu Central dawrna kawngah Chief Minister Office chuan a tul hun apiangah an pui thei tih pawh sawiin, sawipui tur leh thlen duh an neih te chu hrilh zel turin a chah bawk a ni.