Aizawl-ah World Cancer Day hman a ni

Khawvel pum-a Cancer dona ni ‘World Cancer Day’ chu nimin February 4, 2025 khan hmun hrang hrangah hman niin Aizawl-ah pawh Taxation Auditorium-ah he ni pual hian hun hman a ni.

National Health Mission (NHM) hnuaia Programme pakhat, National Programme for Prevention & Control of Cancer, Diabetes, Cardiovascular Diseases & Stroke (NPCDCS)-in World Cancer Day puala hun an hman hi H&FW Department-a Principal Director Dr. Vanlalsawma chuan hmanpuiin Cancer natna veite enkawl kawngah a enkawltu leh damlo chenpui te chu an pawimawh hle tih sawiin, chumi kawngah chuan thawktute pawh nasa lehzuala tan la turin a fuih a, Cancer natna chuan kiam lam a pan zel theihna tura mahni invawn kawnga tan la turin kalkhawmte chu a chah nghal bawk a ni.

‘United by Unique’ tih thupui hmanga ‘World Cancer Day’ puala hun hman hi NHM-a Mission Director Dr. Eric Zomawia chuan kaihruaiin Dr. Jeremy L.Pautu, Director, MSCI, Zemabawk chuan Mizoram State Cancer Institute chungchang report pein, Mizoram-a Cancer enkawlna Cobalt Therapy chu February 4, 1998-a neih tan a nih thu leh TCCC khawl thar pawh February 4, 2024 a neih a nih thu a sawi a. He ni thupui hmang hian Dr.Zirsangliana Chhangte, Gynecologist Oncologist. MSCI Zemabawk chuan zirtirna a pe bawk a ni. Mizoram State Cancer Institute-in a tarlan danin kum 2023 chhung khan Cancer Hospital Zemabawk-a Cancer natna vei inziaklut chu 2100 an chuang a ni.