MCC bawhchhia a puh Minister pahnih te chungchangah SEC in thuchhuah a siam

State Election Commission, Mizoram chuan Model Code of Conduct (MCC) bawhchhiaa hek Minister Lalnghinglova Hmar chuan dan a bawhchhiat loh thu sawiin, Minister Vanlalhlana ngaihdam dilna an pawm thu an sawi.

Nimin-a SEC thuchhuah tarlan danin MNF General Headquarters-in Complaint a thehluh avangin PWD Minister Vanlalhlana chu MCC bawhchhia a puhna chungchang ah hian insawifiah tura hriattir a ni a, Vanlalhlana chuan Model Code of Conduct (MCC) bawhchhe tura a tum reng vanga video clip chu siam anih loh thu leh, dan bawhchhiatna a ni tih hre lova tihpalh a nih thu sawiin, ngaihdam a dil a, State Election Commission chuan thil awm dan hrang hrang chhuia a enfiah hnuah Minister-in a thil tih pha lova ngaihdam a dilna chu a vawikhat tihna anih avang leh ti tawh lo tura a intiam avangin pawmsakin a ngaidam tih an tarlang a, Hei bakah hian Video Clip chu campaign naa ngaih theih anih avangin delete nghal turin a hriattir a. Hemi atana a hmalakna hi ni 3 chhunga State Election Commission-a thehlut leh tura hriattir a ni bawk a. Minister hi a intiam ang ngeia Inthlan kaihhruaina ngun taka zawm tur leh fimkhur lehzual tura a intiam ang ngeiin, Dan bawhchhe lova hma la tawh tura beiseiin a hriattir thu a tarlang a ni.

Hetihlai hian MCC bawhchhia a puh Minister Lalnghinglova Hmar chuan MCC a bawhchhe lo niin SEC chuan tarlang thung a, hemi chungchanga SEC thuchhuah chuan MCC bawhchhia a puhna hi Minister Lalnghinglova Hmar hian State Election Commision thupek angin a hun takah chhangin MCC bawhchhiatna a neih loh thu a sawi tih an tarlang a. “State Election Commission thlir danin, Election Model Code of Conduct (MCC) Para - VIII (2) leh (14) bawhchhia nia an puh chungchangah Minister hian an Party mite hmaah Sawrkar hmalakna awm tawh sa leh hmalakna kal mek chungchang a hrilhfiah mai nia a lan avangin, Model Code of Conduct bawhchhiatna a ni lova; Model Code of Conduct-in a sawi hmasawnna lam hawia bul tanna lung phum leh policy thar puan te, thawh zawh tawh hawnna emaw chutiang lam kaihhnawih hawnna inkhawm buatsaih leh ruahhmanna thar lam hawi reng reng puan chhuah loh tur tih hian a huam lo a ni,” an ti bawk.