Serchhip District-ah State Day of Prayer hmang dawn
February ni 20-a Mizoram State Day hi ‘Mizoram State Day of Prayer’ atana hman nise, Aizawl bakah District Headquarters tinah leh khaw hrang hrangah Kohhran bik awm loa a huhoa hman nise tia rel ni tawhin hemi chungchang ngaihtuaha nimin-a Serchhip District Bawrhsap Paul L. Khuma hova DC Meeting Hall-a mi pawi-mawhte thukhawm chuan Serchhip District-ah pawh khawpui-ah leh thingtlang khaw tinah a remchan dan anga hman nise tiin an rel a. Hemi atan hian Working Committee chu din nghal niin Presbyterian Kohhran Serchhip Bialtu Pastor, Pastor K. Ramdinthara chu Chairman atan ruat a ni a, Working Chairman atan Serchhip Sub- Hqrs. YMA President Kawlthuama ruat niin Office Bearers leh Committee Member atan sawrkar Official te, Kohhran hrang hrang aiawhte, tlawmngai pawl aiawhte ruat an ni. He Working Committee hian programme hman dan tur chipchiar an duang ang.
Nimin-a thutkhawm ah hian Serchhip District Bawrhsap Paul L. Khuma chuan kum kaltaa Serchhip-a State Day hman a lo nih tawh dan te Committee hmaah hian a sawi lang a. Kum kaltaa hlawhtling taka hman a lo nih tawh angin Working Committee te kaihhruaina hnuaiah kumin ah pawh hlawhtling takin he hun hi kan hman theih a beisei thu a sawi a ni.
Nimin-a thutkhawm ah hian Serchhip-a Kohhran hrang hrang hruaitute, sawrkar Official te leh Aizawl atangin State Day of Prayer Committee aiawh te an lo kal a. He hunah hian Chhungi Jahau kaihhruaiin Awareness Campaign neih nghal niin thusawi bakah tawngtai rualna neih a ni bawk.
State Day of Prayer hi nikum (2024) khan a tum khatna atana hman niin kumin hian ‘I ram lo thleng rawh se’ tih chu thupui-ah hman a ni ang.
Comments
Post a Comment