Youth Representative of India thlan zingah Mizo tel

India Sawrkar in Vision 2047 ti hlawhtling tura hma a lakna, Viksit Bharat Young Leaders Dialogue, Youth Festival 2025 neih zawh takah Mizoram atanga tel Grace Lalrinpari Hauzel chu Prime Minister hmaa presentation nei thei tura thlan a ni.

Viksit Bharat Young Leaders Dialogue, Youth Festival 2025 Mizoram team hruaitu zinga mi, Dr. Rosaline Varsangzuali chuan Viksit Bharat Challenge a tel a presentation nei tur hian India ram pum atangin mi 3000 thlanchhuah an ni tih sawiin, Mizoram Team atangin Grace Lalrinpari Hauzel leh Yerrabelli Dedeepiya Reddy te Short list zingah an tel tih a sawi a, a tawpah erawh Grace Lalrinpari Hauzel chauh hian Prime Minister hma a presentation neihna hun hi a nei thei dawn tih sawiin, hmarchhak State atanga thlan awmchhun a nih thu a sawi bawk.

He Festival bultanna atan hian MYBharat Portal ah inziaklut in thalai nuai 30 ten November 25 khan Online in Quiz an chhang a. Heta titha zual thlan mi nuai thum te chu thupui hrang 10 atanga an thupui duh ber hmangin Essay ziah tir leh an ni a. Thupui tin-a Essay ziak tha te chuan an Essay ziah hmangin Power Point Presentation in ram inrelbawlna leh hmasawnna tura an ngaihdan leh hriat thil te sawichhuahna hun pek an ni a. Heng presentation a titha thupui tin atanga mipa leh hmeichhia pakhat ve ve thlang chhuak lehin, chungte chuan Prime Minister Narendra Modi hma ah an ngaihmawh zawngte leh ram hmasawnna tura an vei zawng te an thupui theuh hmangin an inlan leh dawn a ni.