Halmawi khapna thlirlet

Home Minister K.Sapdanga hovin halpuah leh halmawi khuahkhirhna kalpui dan thlirletna chu nimin khan neih a ni.

Secretariat Conference Hall, Aizawl-a Krismas leh kumthar vuakvet-a halpuah leh halmawi khuahkhirhna kalpui dan thlirletna hun ‘Review Meeting of Prohibition of Fire Crackers and other Pyrotechnic material’-ah hian Home Minister K. Sapdanga chuan Mizoram boruak vawn thianghlim zel tumna avanga Krismas leh kumthar vuakvet a halpuah leh halmawi khuahkhirhna kalpuina kawnga sawrkar, Kohhran leh tlawmngai pawl thawhhona leh hmalakna fakawm a tih thu a sawi a, hmasawnna nasa tak hmuh tur a awm chu lawmawm a tih thu a sawi. 

He thutkhawm hi Chief Secretary Khilli Ram Meena chuan kaihruaiin halpuah leh halmawi khuahkhuirhna kalpuina kawnga sawrkar leh tlawmngai pawl aiawh mi pawimawhte an tel a, he huna tarkan danin Mizoram puma halpuah leh halmawi kaihhnawih thupek bawhchhiatna avanga thubuai ziahluh 55 zinga 48 chu Aizawl District chhunga mi a ni.

Mizoram Pollution Control Board atanga tarlan danin Aizawl khawpui a kum 2023 December ni 31 zan-a boruak thianghlim lam tehna, Air Quality Index (AQI) chu 597 a nih laiin kum 2024 December ni 31 zan-ah erawh 115 a ni a, Mizoram District hrang hranga AQI Manual Station atanga a lan danin District dangte pawh AQI 50 hnuai lamah a awm deuh vek a ni.