MZP in hnalak hrang hrang enzui zel an tum

Mizo Zirlai Pawl (MZP) General Hqrs. President chuan hna lak hrang hrang an enzui zel dawn tih a sawi.

Kum 2025 atana MZP Pisapui hawnna hun nimin-a neih ah MZP President H. Lalthianghlima chuan MZP chuan harsatna tam tak karah kum 90 hmel a hmu thei ta tih sawiin, “MZP chuan kum tam tak ram leh hnam tan hma a lo la tawh a, hmalam panin a kal zel dawn a ni,” a ti a. “Kum bul kan tan a, hmalakna tur a tam nghal hle a ni,” a ti a, “Tunhnaia hna hrang hrang lakah thil fel hlel tam tak a awm a. MZP chuan complaint kan dawng nasa hle a. Hetiang thu hriat tur awm reng hi a pawi hle a ni,” a ti a. National Institute of Technology (NIT) Mizoram-in November 8, 2024 (Zirtawpni) a an hnalak tur Advertisement a tihchhuah tawh chu dik taka kalpui tura ngenin, Fair taka a thiam leh tling ngei la turin thuneitute a ngen nghal a, “Hnalak hrang hrang kan enzui zel dawn a ni,” a ti bawk.

MZP Pisapui hi December 13, 2024 khan kharin Zirlaite leh ram leh hnam tan a duh apiangte tana dawr theih turin hawn leh a ni a, Zing dar 10:00 atanga tlai dar 5:00 thleng dawr theih a ni ang.