Sialhawk khua in Lakhuihthei an thar hnem; A hralhna tur hriat loh avanga tawih a tam

Khawzawl District-a awm Sialhawk khuaa Lakhuihthei chingtute chuan nikum khan Lakhuihthei quintal 13,000 vel an tharchhuak a, an Lakhuihthei tharchhuah atang hian quintal 9,000 vel hralh chhuakin quintal 4,000 vel chu hralhna tur an hriat loh avangin a tawihral a ni.

Sialhawk khuaah hian kum 2005 vel atang khan Lakhuihthei hi chin tan a ni a, kum 2016 khan khawtlang angin an buaipui tan a, tunah hian chhungkaw 250 velin an ching mek a. Nikum lamah hralhna lamah an buai bakah tuna an tharchhuah lai mek te pawh a hralhna turah buaina an tawh chhoh zel avangin chhungkaw engemaw zat chuan kuminah hian Lakhuihthei chin hi bansan an rilruk tih an sawi a ni.

Sialhawk khuaa Lakhuihthei chingtute hnen atanga thu dawn danin, nikum hmasa 2023 khan Lakhuihthei hralhna tur Mizoram Sawrkarin a ngaihtuahpui avangin Lakhuihthei quintal 12,000 vel an hralh chhuak thei a. Nikum 2024 khan Sawrkar lam atangin a hralhchhuahna kawngah puihna an hmuh loh avangin anmahni in an theih angin Market an inzawn a, Quintal 9,000 vel hralhna tur an hmuh laiin Quintal 4,000 vel chu hralhna tur an hriat loh avangin a tawihral a ni. Lakhuihthei hi chawhrualin Kg.1 Rs.10/- in an hralh ang a ni a, nikum khan Rs. 90,00,000/- vel an lei laiin Rs.40,00,000/- man vel a tawihral thung a ni.