Tuialhthei atanga Chhiah lak belh ah sum hmu tam

Mizoram sawrkarin nikum September ni 1 atanga Petrol leh Diesel man atanga Chhiah a tihpun atangin, December thla thleng khan Road Maintenance Cess leh Social Infrastructure & Services Cess atangin Rs. 452,32,600 a hmu tawh.

Taxation, Finance Department chuan nikum August ni 30-a hriattirna a tihchhuah-ah Petrol leh Diesel-ah litre khat zelah Social Infrastructure & Services Cess Rs. 2 leh Road Maintenance Cess Rs. 2 lak a nih tur thu a chhuah hnuahn chhiah hi lak tan a ni a, October thla chhung khan Rs. 16,48,352 hmuh a ni a, November thla bik ah Rs. 426,50,312 hmuh leh niin, November thlaa Chhiah lut a tam chhan hi October thla khan khawl lamah fel lo a awm avangin Petrol Dealer ten pawisa an thun theih loh avang a nih thu Taxation, Finance Department lam hotute chuan an sawi a. December thla khan Road Maintenance Cess leh Social Infrastructure & Services cess atangin Rs.9,33,936 hmuh a ni bawk.

Tuialhthei man-a Chhiah lak hi sawrkar chuan Road Maintenance Cess chu kawng atan liau liau hman a nih tur thu an lo sawi tawh a, Social Infrastructure & Services Cess chu zirna In tihchangtlunna atan te, hriselna kaihhnawiha hman atan te, Skill Development leh hmeichhia te chawikanna atana hman tur a nih thu a sawi bawk a ni.

Comments