Party inthliarna awm lova rualkhai taka kalpui tum

Mizoram Sawrkar-in kut hnathawktute khaichhuahna tura 'Bana kaih policy' a duan chu party inthliarna awm lova rualkhai taka kalpui tum a nih thu Adviser to Chief Minister (Political) Lalmuanpuia Punte chuan a sawi.

ZPM West Tuipui Block I leh Block II-ten Kawrpuichhuah leh Lamthai-a inkhawm an buatsaih hmanpuia thu a sawina ah Adviser to Chief Minister Lalmuanpuia Punte chuan, dinchhuah tum tak tak te chu Mizoram Sawrkar-in loan pung lo chi hmangin an bân-ah kaih a tum niin a sawi a, hetihlai hian Hand-holding Policy hnuaia Loan pekchhuah tur chu sumdawnna lian tham kalpui ve thei chiah lo tur thingtlang mite tan dil ve a buaithlak dawna a lan avangin, chung mite tan chuan a hranpain CM Special Package duan fel tawh a nih thu a sawi bawk a ni.

Adviser to Chief Minister Lalmuanpuia Punte chuan, mipui khaichhuahna tura ruahmanna an duan thenkhat chu vote zawnna atan chauha hman an duh loh avangin inthlan zawh tawh hnuah an puangzar chauh niin a sawi a; Sawrkar-in mipuite dinhmun chawikanna tura hmalakna a duan te chu an hnena a thlâwna sem tur ni loin, hma an lâk tawhna senso rulhletna tur zawk a nih thu sawiin, heng ruahmanna chak zawka kalpui a nih theih nan Sawrkar thawhpui theih tur, rorellai party candidate thlang tling theuh turin kalkhawm te chu a sawm a ni.

Comments