School 13 te hnenah Interactive flat panel sem a ni
Mizoram Samagra Shiksha-in Interactive flat panel an lei chu nimin khan School Education Minister Dr Vanlalthlana hovin sem a ni.
School Education Complex Conference Hall-a Interactive Flat Panel semna hunah hian Education Minister chuan Interactive Flat Panel chu sawrkar hmasa hun laia sem tawh chhunzawmna a ni tih sawiin, “Zirna ah hian khawvel technology changkang zel milin kan kal ve thei tur a ni a, zirlaite hian hna an zawn hunah tunlai technology nen an inel tawh dawn a, chuvangin zirlaibu bakah zirtirtute pawh tunlai khawvel mila kan inher rem ve zel a ngai,” a ti a. Tunlai khawvelah hian eng nge thleng tih ngaihven a kan inchhiar var a, kan hriatna chu zirlaite kan pek chhawn ve leh a ngai a ni, a ti a. Classroom a zirtirna chu Smart Board hmangin Audio Visual Mode-a kalpui theih a lo ni ta tih sawiin, Zirtirtute chu naupang an zirtirna ah a tam thei ang ber hmang tangkai turin a chah a. Zirtirtute chu naupangte zirtirna kawngah khalhluh tumna Goals nei turte leh chumi mila kal thin tur chuan a fuih bawk a. Zirna in hma a sawn theih nan zirtirtute chuan Lesson Plan an siam te pawh ngai dawn tih a sawi bawk.Nimin-a he hun hman ah hian Interactive Flat Panel hi School 13 hnenah sem a ni a, chung sikulte chu- Govt. Chaltlang High School; Govt. Hrangchhuana High School; Govt. Pianghleia High School; Govt. Sihphir High School; Govt. KVM High School; Phunchawng RMSA Secondary School; Govt. MICE High School; Govt. J.L.High School; Govt. Central High School; Govt. Kulikawn High School; Govt. Sialsuk Higher Secondary School; Govt. Republic Higher Secondary School leh Govt. Republic High School te an ni a. Heng School-a Principal, Headmaster leh Zirtirtute chu he hunah hian an tel bawk a ni.
Comments
Post a Comment