Forest Clearance chinfel veleh Lengpui-a NIT Campus sak hna rang taka thawh zui tum

Chief Minister Lalduhoma chuan sawrkarna an chan hnuah Lengpui a NIT Campus sak meka harsatna an tawh, Forest Clearance chu rang takin an umzui tih sawiin, an chinfel chuan sak chhunzawm hna rang taka thawh an duh tih a sawi.

National Institute of Technology (NIT) Mizoram 8th Convocation chu niminpiah khan Art & Culture Auditorium, Beraw tlang-ah neih niin he hun a hmanpuina ah hian Chief Minister chuan NIT chu India rama zirna In tha bik kan neih te zinga mi a nih thu leh NIT Mizoram atanga hlawhtlinna chang thar zirlai 147 te a lawmpui thu a sawi a ni. Chief Minister chuan a kaihhruai sawrkar in NIT Mizoram pawimawh zia a hriat thu sawiin, “Lengpui-a Campus sak meka harsatna kan tawh Forest Clearance pawh rang takin kan umzui. Sawrkar laipuiah ziakin kan thlen a, hmaichhanah kan sawipui bawk a. Kan dilna te ngaithlain hman ni deuh khan Forest Advisory Committee an lo kal a, Penal CA leh Penal NPV kan chawi tur cheng vbc. 22.45 kha cheng vbc. 3.8-ah min tihhniamsak ta a ni. Board of Governor lamah hei hi kan thawn a, an rawn chinfel thuai kan beisei. Hei hi kan chinfel chuan a sak chhunzawm hna hi rang takin kan thawk zui ang, a ti bawk.

NIT Mizoram Convocation-ah hian Board of Governor-a Chairman Harshavardhan Neotia pawhin NIT Mizoram chu India rama 5G Case Laboratory hmang thei tlem te zinga mi a nih thu leh IIT Madras leh IIM Visakhapatnam te nen inremna neiin an zirlai pass chhuakten IIT Madras-ah direct-in Ph.D an tizui thei tih a sawi a, heta Final Year an zir lai atangin IIM Visakhapatnam-ah MBA zir zawm turin an inziaklut thei bawk tih sawiin, NIRF Ranking-ah 101-150 huangah an awm mek thu leh reilote ah hei aia sang zawkah hian an chho ngei dawn tih a sawi bawk.

Tun tuma NIT Convocation-ah hian kum 2020 Batch B.Tech degree, kum 2022 Batch M.Tech degree leh Ph.D degree te hlan a ni a. B.Tech Branch te ah hian Civil Engineer degree mi 28, Computer Science & Engineering degree mi 25, Electronics & Communication Engineering degree mi 25, Electrical & Electronics Engineering degree mi 20 leh Mechanical Engineering degree mi 18 te pek an ni a. M.Tech degree hi mi 3 hnenah hlan niin Ph.D Degree hi Branch hrang hrang 7 atangin mi 28 te pek an ni bawk a. Nimin-a Degree hmu thar zawng zawng te hi an vaiin mi 147 an ni.

NIT Mizoram hi kum 2009-a sawrkar laipuiin NIT sawm (10) a din thar te zinga mi niin July 2010 khan NIT Nagpur Campus uapna hnuaiah bul tan a ni a. An Campus tur hi Lengpui-ah sak niin engemaw chen hna thawh a ni tawh a. Forest Clearance lamah chinfel ngai a awm avangin hna hi chawlh rih a ni a, tunah hian Chaltlang-ah building 11 luahin zirna an kalpui mek a. Zirlaite awmna tur hostel building 6 dang an luah hawh tel bawk.

Comments