Raltlan te hnena buhfai sem zofel thawkhat tawh

Sawrkar laipui in ruahmanna a siam angin Mizoram-a raltlan awm mek te hnena a thlawna buhfai sem hna kalpui chu Aizawl District tih loh District dang zawngah zawhfel a ni tawh.

Sawrkar laipui Ministry of Home Affairs chuan Mizoram-a raltlan awm zawng zawng tana a thlawna buhfai semna turin cheng vbc. 5 a ruahman a. He pawisa hian buhfai Metric Tonne 1,379 chuang chu Ministry of Consumer Affairs, Food and Public Distribution hnenah buhfai leiin Food Corporation of India (FCI) kaltlangin Mizoram sawrkar Food, Civil Supplies & Consumer Affairs Department chuan ruahmanna siam lawk angin District tinah an chanpual tur theuh an thlen sak a. Hei hi District tina thuneitute'n an District chhungah an lo sem chhuak leh a. Mizoram sawrkarin Ministry of Home Affairs hnena buhfai sem dan tur report a pek na a raltlan awm zat a thehluh chu mi 43,788 a ni a, heng te hi Myanmar raltlan 33,764, Manipur atanga lokal 8,010 leh Bangladesh raltlan 2,014 te an ni a. Buhfai hi mi pakhat zela kg. 31 leh gram 500 zela sem tura chhut a ni.

Raltlan tam berna District, Champhai District-ah chuan raltlan 14,390 hnenah buhfai quintal 4,533 chu sem zawh vek a nih tawh thu Champhai District Bawrhsap V.L. Remliana chuan a sawi a. Champhai District-ah hian Myanmar raltlan 13,986 awmin Manipur atanga sahimna zawnga awm mi 404 an awm mek bawk a ni. Champhai District dawta raltlan tamna ber Lawngtlai District-ah pawh raltlan 8,020 hnenah buhfai quintal 2,526 sem zawh a ni tawh bawk a. Lawngtlai District-ah hian Myanmar atanga raltlan mi 5,922 leh Bangladesh Chittagong Hill Tracts atanga raltlan 2,014 an awm mek a, Bangladesh raltlante hi District hrang hrangah awm darh lovin Lawngtlai District-ah chauh an awm a. Buhfai sem hna hi kumhlui November ni 11 khan thawh tan a ni.

Raltlan awm tamna District pathumna Siaha District-ah pawh raltlan 5,953 te hnenah buhfai quintal 1,875 sem a ni tawh a. Siaha District Bawrhsap VL. Hruaizela chuan November ni 20 atang khan buhfai hi an sem tan tawh thu a sawi a. Siaha District-ah hian Manipur raltlan an awm lova, Myanmar atanga rawn raltlan vek an ni. Raltlan awm tlemna ber Khawzawl District-ah chuan raltlan 147 chauh an awm a, an zinga 19 te hi Manipur atanga rawn kal niin mi 128 te hi Myanmar mi an ni a, buhfai quintal 46 an sem zo tawh bawk a. District dang dangah pawh buhfai hi sem zawh a ni tawh bawk a ni.

Aizawl District-ah erawh chuan tunhnai khan buhfai sem hna hi kalpui tan chauh a ni a, an District-a buhfai an sem tlai chhan hi raltlan awm tam tak hi a thlawna buhfai dawn ngai lo tura khawsa theite an nih avangin an thlitfim chhungin hun a duh deuh niin an sawi bawk.