Nikum-ah Serchhip District ah Scrub Typhus a hluar
Serchhip CMO Office atanga LENKAWL in thu a dawn danin nikum January thla atanga December thla chhung khan Serchhip District-ah hian mi 9381 te thisen enfiah atangin rannung seh, Scrub Typhus hri kai mi 2510 zet hmuhchhuah an ni a, heng hri kai te hi enkawl dam deuh vek ni mah se rannung seh avanga mitthi pakhat chhin-chhiah a awm thung a ni.
Hemi hun chhung vek hian Typhoid hri kai enfiah mi 9417 awmin heng atang hian hri kai mi 1630 hmuhchhuah an ni bawk a, nikum August thla khan North Vanlaiphai PHC huamchhung ah Typhoid hri hi a leng bawk a ni. Nikum chhung vek khan Serchhip District chhungah mi 2611 te enfiah atangin thosi seh natna chi khat, Dengue vei mi 468 hmuh an ni bawk a, mi 4180 te enfiah atangin Malaria kai mi 27 hmuh an awm bawk a ni.