Nikum-ah ruihhlo vanga thi mi 67 an awm

Kum kalta 2024 chhung khan Mizoram-ah ruihhlo hmansual avangin mi 67 an thi a, a hma kum (2023) aiin mi pakua in an tlem zawk a ni.

Excise & Narcotics Department chhinchhiahna atanga a lan danin kum kalta 2024 chhunga Mizoram-a ruihhlo hmansual vanga thi mi 67 zinga 58 te chu mipa niin midang 9 chu hmeichhia an ni a, kum 21 leh 57 inkar te niin an zinga mi 39 te chu Heroin ti thin an ni a, midang 28 te chu ruihhlo dang ti an ni thung a, kum hmasa 2023-ah khan ruihhlo vang hian mi 76 thiin mipa 64 leh hmeichhia 12 a ni a, kum 2004 hnu lama ruihhlo vanga thi an tam ber tum niin nikum khan tlem in a tlahniam leh hret a ni a. Kum khat chhunga Mizoram-a ruihhlo vanga thi tam ber kum chu kum 2004 kha niin mi 143 zet an thi a, heng te hi mipa 122 leh hmeichhia 21 an ni a. Kum 2000-ah mi 139 leh kum 2003-ah mi 136 an thi bawk a ni.

Mizoram-ah hian kum 1984 atang khan ruihhlo vanga thi hi chhin-chhiah niin kum 2024 thleng khan mi 1,879 an thi tawh a, an zinga ,653 (87.97%) chu mipa niin midang 226 (12.03%) te chu hmeichhia an ni thung a. Mizoram-a ruihhlo vanga thi tam lai chu kum 1998-2004 inkar kha niin kum sarih chhung hian kumtin mi 80 aia tlem lo an thi a, hemi hun chhunga ruihhlo vanga thi belhkhawm chu mi 785 niin hetih hun laia an thihpui tam ber Proxyvon/Parvon spas a ni a. Chhinchhiahna atanga a lan danin ruihhlo avanga Mizoram-a thi 1,879 zinga 1,161 te chu Proxyvon/Parvon Spas vanga thi niin kum 2017 hnu lamah erawh chuan thihpui an awm tawh lo thung a. Kum 2016 hnu lamah Heroin vanga thi mi 165 lai an awm tawh thung a ni.