IMD kum 150 tlin lawmna ramchhungah neih a ni
Ministry of Earth Sciences hnuai India Meteorological Department din champhaphak kum 150-na chu nimin khan Aizawl-a Administrative Training Institute (ATI) Conference Hall-ah Chief Secretary Khilli Ram Meena hovin hman a ni.
India Meteorological Department din champhaphak kum 150-na lawmna hunah hian Chief Secretary chuan India Meteorological Department chu India khua leh tuite tana Department tangkai bik, sik leh sa inthlak danglam nasa avanga chhiatna thleng theite laka lo inven lawkna kawnga thawhhlawk tak an ni tih a sawi a, tlangram leh tuipui kam-a awmte tan a tangkai lehzual tih sawiin, Mizoram a an inbenbelna kawngah Mizoram sawrkar chuan theihtawpin a tanpui dawn tih a sawi a ni.He hunah hian IMD hnuaia Aizawl Met Centre Director Sudhir Kumar Dwivedi chuan hmarchhaka IMD Regional Centre ten sik leh sa ngun taka an vil thu leh hmarchhak State te tan hna ropui tak an thawh thu a sawi a. Hmarchhak-a sik leh sa dinhmun chu danglam leh vil hautak tak a nih thu sawiin, rim taka an thawh thin thu a sawi a. Tunlai thiamna hmanga IMD chu thawmchak zel a nih thu sawiin, India ramah an inzarpharh zel dawn tih a sawi bawk. Doordarshan Aizawl Director (News) Nampibou Marinmai pawhin India Meteorological Department chu an bul tanna tlawm hle mah se tunah chuan Department changtlung leh tangkai tak, kuthnathawka eizawngte mai bakah chhiatrupna thleng thei laka invenna kawngah an tangkai hle tih a sawi a ni.
India Meteorological Department (IMD) kum 150-na lawmna hun hi New Delhi-a Bharat Mandapam-ah chuan Prime Minister Narendra Modi hova neih a ni a, Prime Minister chuan India ram hmasawn nan nasa takin IMD in hna an thawk tih sawiin, sik leh sa lama tunlai thiamna hmanga hmalakna tur Mission Mausam a hawng a. IMD kum 150-na pualin Rs. 150 thir tlangzarhin IMD Vision 2047 a tlangzarh bawk.
Comments
Post a Comment