MSCPCR in Social Media-a thu post ah FIR thehlut

Mizoram State Commission for Protection of Child Rights chuan Naupang kum tlinglo, Dan nena inrem lova che te thlalak leh hming te Social Media a pholangtu YouTuber leh Facebooker te lakah FIR a thehlut.

    MSCPCR Chairman Jimmy Laltlanmawia chuan tunhnaia Internet Social Media -YouTube, Facebook, WhatsApp leh Digital Media platform hrang hranga naupang Dan nena inrem lova che te hming, nihna, thlalak, video leh address te tarlan a ni leh thin chu ngaimawhawm a tih thu sawiin, naupang kum tlinglo te hian dan an bawhchhiah a nih pawhin ‘The Juvenile Justice (Care & Protection of Children) Act, 2015, Section 74’ chuan an nihna leh thlalak phochhuah leh puanzar a khap tlat thu a sawi a. Hetianga naupangte hming leh nihna zawng zawng pholangtu te chu dan anga hrem theih an nih thu sawiin, Commission chuan Dan bawhchhetute chu hrem an nih theih nan hma a la zel dawn tih a sawi bawk.