Mizoram-ah Jail tang 1591 an awm mek

Mizoram-ah Jail 10 awm mekin heng Jail hrang hrangah hian mi tang 1591 an awm mek a ni.

Mizoram sawrkar-a Prison Department in an chhinchhiahna atanga a lan danin Mizoram-a Jail awm 10-ah hian mi tang 1386 awm theih a nih laiin tun dinhmunah tang 1591 an awm mek a, heng Jail tang mek te hi mipa 1424 leh Hmeichhia 162 te an ni a, nu te an tan avanga tang ve naupang 5 awmin heng zinga pathum te chu Central Women Jail-a awm te an ni. Jail tang zinga mipa 841 leh hmeichhia 132 te chu thubuai ngaihtuah lai niin Court in thiamloh a chantir tawh mi 613 an awm a, an zinga 55 te chu damchhunga lung In tang tura hrem an ni a, an vai hian mipa vek niin thiamloh chantir zingah hian hrehawm taka tang tura chungthu rel mi 339 awmin midang 219 te chu hremna nep zawk pein lung In tang tura hrem an ni.

Mizoram-a Jail 10 awm zingah hian Aizawl-a Central Jail chu tang awm tam theihna ber niin mi 438 tan theihna a ni a, hetihlai hian Central Jail-ah hian tang 793 an awm mek a, Aizawl-a Central Women Jail-ah mi 120, Aizawl District Jail-ah mi 110, Lunglei District Jail-ah mi 114, Siaha District Jail-ah mi 74, Champhai District Jail-ah mi 119, Kolasib District Jail-ah 77, Lawngtlai District Jail-ah mi 36, Serchhip District Jail-ah mi 80 leh Mamit District Jail-ah mi 63 an tang mek a, Mizoram-a Jail 5- Central Jail, Central Women Jail, Aizawl District Jail, Lunglei District Jail leh Champhai District Jail-ah te chuan tang awm thei zat aia tam an tang mek a, District dang 5- Kolasib, Siaha, Lawngtlai, Serchhip leh Mamit District Jail-ah te chuan tang thei zat bituk aia tlem an tang a ni.