MNF Party chu Party zinga thlanbik niin sawi

MNF President Zoramthanga chuan MNF chu Lalpa’n Mizo hnam chanchintha hrilhna kawnga hruai turin party dang zawng zawng zinga a thlan bik a nih thu a sawi.

    Kumin atana Aizawl-a Mizo Hnam Run hawnna inkhawm nimin a neih ah MNF President Zoramthanga chuan Election-ah tlak chang a awm thu leh a chhan pawh chi hrang hrang a awm ang tih sawiin, “Pathian in MNF hi chhan neiin a din a, a ral a phal lo, a man tam tak kan pe a ni. Inthlan ah tla mah ila a dawtah kan ding chhuak leh mai. Party tam tak an ral hnuah pawh MNF chu hotu an liam pawhin Pathian in a dang a dah zel,” tiin “MNF hi Lalpa’n Mizo hnam chanchin tha hrilhna kawnga hruai turin party dang zawng zawng zinga a thlan bik a ni. Min duat bik a, tawrh pawh kan tuar nasa bik. Inthlana tlakte hi vanpui chim anga ngaih tur a ni lo. A lehpeka kan thawhlehna tura kan chakna hmanrua a ni,” a ti a. MNF mipuite fuihtharin, “Inthlana kan tlak avangin kan lunghnur viau a. Mahse tuna sawrkar pawh hi kum khat chauh an la kal a, an chuti an khati kan ti ta sup sup a nih hi,” tiin ZPM sawrkar in hun reilote chhunga a thil tih te a sawi a. Heng zingah hian VC Inthlan hun tih hma chungchang te, Air Force kut-a Lengpui Airport pek tum chungchang te; Buhfai man a let-a tih to chungchang te; SASCI kalpui that loh chungchang te leh Kawngpui chhe lutuk chungchang te a tel a, ZPM sawrkar financial management chu a ngaihna awm ngang lo niin a sawi bawk.