Congress an sawrkar leh anih chuan NLUP an tharthawh leh dawn tih MPCC President in a sawi
Mizoram Pradesh Congress Committee (MPCC) President Lal Thanzara chuan Congress an sawrkar leh anih chuan NLUP an tharthawh leh dawn tih a sawi.
Kumin atana Aizawl-a Congress Bhavan hawnna Inkhawm nimin-a neih ah MPCC President Lal Thanzara chuan, “Kumthar atana ka thuchah duh che u chu Thufingte 16:3-ah chuan 'Lalpaa innghatin thil ti la, i thiltum chu a hlawhtling ngei ngei ang’ a ti a. Congress party ten kan thiltih turah te Lalpa-ah innghah nachang i hre thar zel ng u,” a ti a. “Special Assembly-a ka puan tawh ang khan, Congress kan sawrkar leh anih chuan kan Bible in a sawi, 'Heng ka unau te ber te chunga in tih hi ka chunga ti in ni' a tih angin, Mizoram mipuite tan NLUP kan tharthawh leh dawn a ni,” a ti bawk.MPCC President chuan Boruak thianghlim kan neih theih nan Halpuah leh Halmawi Kristmas leh Kumhlui thlah zana Sawrkarin a khap chu Kohhran leh Central YMA te thlawpna avangin kum dang aia kan uar lo chu lawmawm a tih thu sawiin, “Ram leh mipuite thatna tura sawrkar hmalakna te chu Congress Party chuan kan thlawp zel dawn a ni,” a ti a. “Kan khawtlang nun leh dinhmun kan hria a, ruihhlo in min run mek a ni. Natna hrang hrang leh Cancer kan vei nasa em em te, neih inang inkawp an lo pung ta te hi keini Kristian ram inti te tan a inhmeh lo em em a ni. Heng hi kan vei a hun tawh em em a, thalai hetiang vei mite siamtha a, politic a rawn lut turin kan sawm che u a ni,” a ti bawk.
He hunah hian AICC Member leh MPCC President hlui Dr Lal Thanhawla pawhin thu sawiin, “Kan hotute hian kan tih theih loh tur ti turin an insawi ngai lovin ka hria. Lengpui Airport kan siam lai pawh khan 'Choak bak a tum lovang' min tih sak thin. Mahse kan hman tangkai zia in hria a, a hlawhtling hle a ni. Amaherawh chu tihral chak tlat te kan lo awm a, a pawi hle a ni,” tiin an hmalakna hrang hrangte a sawi a. “Tun kumthar hi Congress tan kumthar lawmawm lo nise, kan inlungrualna kum lo nise, sawrkar leh tura tan kan lak zelna atan malsawmna kum lo nise tih hi ka duhthusam a ni,” a ti bawk.
Nimin-a Congress Bhavan hawn inkhawm hi MPCC Vice President Ronald Spa Tlau chuan kaihruaiin MPCC President kalchhuak ta Lalsawta pawhin thu a sawi bawk a ni.
Comments
Post a Comment