Nikum chhungin Dengue vei mi 751 hmuh an ni

Kum kalta 2024 chhung khan Mizoram-ah Dengue vei mi 751 hmuhchhuah an ni.

State Vector Borne Diseases Control Programme (SVBDCP) te’n an chhinchhiah danin kum 2024 chhung khan Mizoram-ah sample 8986 endik a ni a, heng zinga 751 chu Dengue a ni tih finfiah a ni a, mi pakhat in nunna a chan bawk a ni. Kum liamtaa Dengue veite zingah a tam ber chu Aizawl District-a mi niin Aizawl District-ah hian hri kai mi 528 hmuh an ni a, nunna chan pawh hi Aizawl District-a mi a ni a. Lunglei District-ah mi 180 an awm bawk a, Champhai-ah mi 17 hmuhchhuah niin District dangah chuan mi 10 hnuailam vek an ni. 

Kum 2012-a Mizoram-a Dengue natna vei mi 6 hmuhchhuah a nih hnu khan mi 8-in nunna an chan phah tawh a. Kum 2022 khan mi 5 an thi a, kum 2023 khan mi 2 thi lehin nikum-ah pakhat a thi leh a. Dengue vanga nunna chan zawng zawng hi Aizawl District ami vek an ni. Kum 2023 khan Mizoramah Dengue natna vei hmuhchhuah a tam ber a, mi 2,060-in an kai a, a hma kum, 2022 khan dawtin mi 1,868-in an vei tih hmuhchuah a ni. Dengue hi thosi chi khat Aedes-in a thehdarh a, Aedes aegypti chu Dengue thehdarhtu ber niin, hetiang Thosi hi Mizoram-ah a tam a, chhun ah min an seh ber tih chu mithiamte sawi dan a ni.