MSSC leh Samagra Shiksha ten thawndunna ziak

Mizoram State Sports Council leh Samagra Shiksha chuan Mizoram Sports tihhmasawnna tura Inremna thuthlung (Memorandum of Understanding) chu nimin khan an ziak.

Thawhdunna thuthlung hi Secretariat Conference Hall-ah ziakin MSSC aiawh Henry Lalrawnkima, Secretary MSSC leh Samagra Shiksha aiawh Lalthanzira, SPD, Samagra Shiksha ten hming an ziak a, Sports Minister Lalnghinglova Hmar leh Education Minister Dr. Vanlalthlana te chu hriat-puitu an ni bawk.

Samagra Shiksha hian Grassroots Level Sports Development (GSDP) an kalpui mek a. Tun sawrkar hian Bana kaih Policy hmalakna peng khat atan thalaite theihna haichhuahna (Talent Identification) Programme chu Mizoram pum huapa chak taka kalpui a tum mek bawk a. GSDP hian naupang kum 6-18 a huam a, heng programme pahnih te hi Sports hmasawnna lama hmalakna tur ve ve a nih a vangin kalpui tum dan leh a huamchin te inang diak diak lo mahse thawhduna zaia khata (Converge) hmalak hian Mizoram chu Sports-ah hmasawnna sang zawkah a hlankai ngei beiseina avanga Inremna thuthlung hi ziah a ni.

MoU ziahna hunah huan Education Minister Dr. Vanlalthlana chuan MSSC leh Samagra Shiksha in MoU an ziak chu lawmawm a tih thu sawiin, Sports Minister nen hian thiantha an nih thu leh he thil hi an lo sawidun fo tawh thin thu a sawi a. Sports Minister Lalnghinglova Hmar pawhin Mizoram Flagship Programme ‘Bana Kaih Policy’ kaltlanga nasa taka Sports tihhmasawn nana hmalak tum a nih thu sawiin, “Mizoram pum huapa thalai te theihna haichhuah programme kalpui tum mek a ni a. Hei hian Mizoram chu Sports a tihhmasawn bakah Olympic 2036 tinzawna kan lo inpuahchahna a ni tel bawk,” a ti.

Comments