Maxi Cab chesual-ah Mizo pahnih an boral

Guwahati leh Aizawl inkar-a tlan Maxi Cab pakhat chu nimin zing khan chesualin Mizo pahnih in nunna an chan.

He Maxi Cab chesual (AS/01KC-9188)-ah hian a khalhtu nen mi pali an chuang a, Guwahati lam atanga Shillong luh hma KM 10 vela hla ah chesualin kawngthlang ah a tlanliam a, vanduaina thlenna hmunah hian Zothanpari (52), Delhi-a an chhungkua-a cheng leh driver N Chauhdhury, Silchar, Assam chuan nunna an chan a, Jenny Lalrinthangi (23), Thinghlun, Mamit District chu Umkiang CHC-ah hruai a nih hnuah a hliam tuar lovin a boral ve leh bawk a. He lirtheia chuang dang Dim Hau Cing chu Umkiang CHC panpui a nih hnuah NEIGRIMS-ah enkawl zui tura hruai a ni thung.

Jenny Lalrinthangi ruang hi Khliehriat-a postmortem a nih hnuah an khua Thinghlun panpui tura ruahman a ni a, Zothanpari ruang hi nizan khan Shillong-ah lumen in Vawiin ah Guwahati Airport atangin Delhi panpui a ni ang a, Shillong DRC Lalchhanhima leh Shillong Group YMA-te chuan a tul angin an buaipui nghal a ni.