Kum 2024 chhungin Serchhip District-ah ASF vangin Vawk thi 3527 leh suat 7069 awm

Vawk pul hri, African Swine Fever (ASF) eng avangin kum kalta 2024 chhung khan Serchhip District-ah Vawk 3527 thiin Vawk 7069 suat a ni bawk.

Serchhip-a AH&Vety Department hotute hnen atanga LENKAWL in thu a dawn danin kum 2021 atanga Mizoram in a tawrh ASF avang hian kum 2021 leh 2022-ah te Serchhip District-ah Vawk thi a awm hnuah kum 2023 khan Vawk thi a awm lo a, nikum 2024 khan May 6-ah Khumtung khuaa Vawk thi chu Rapid Test hmanga enfiah niin ASF hri vanga thi ni ngeia hriat a ni a, hei vang hian Sample hi hmunpui zawkah enfiah tura thawnin ASF hri a kai ngei tih finfiah a ni a, hemi atang hian ASF avanga Vawk thi leh suat hi awm chho deuh rengin nikum December 13 thleng khan ASF vanga Vawk thi hi a awm a, hemi hnu lamah erawh chhinchhiah belh an awm lo thung a ni.

Nikum chhunga Serchhip District-a ASF hri leng hi Veng leh khua 31-a chhungkaw 2127 ten tuarin ASF vanga Vawk thi 3527 awmin Vawk 7069 suat a ni bawk a, nikum chhunga Serchhip District-a ASF avanga Vawk thi leh suat hi a vaiin 10,596 a ni a. Mizoram sawrkar chuan ASF hri leng hi State Disaster Management Authority pawmpuina in kum 2024 chhung atan leh Mizoram State huamchhung atan State Specific Disaster-ah a puan tak avangin ASF avanga Vawk thi te hnenah zangnadawmna pek theih a ni dawn a, sawrkar in kaihhruaina a siam dan chuan chhungkaw pakhat tan Vawk paruk (6) zelah zangnadawmna hi pek theih a ni dawn a ni.

ASF hri leng hi State Specific Disaster-ah puan ni mah se hri leng avanga Vawk suat te hnenah erawh zangnadawmna hi pek theih a ni lo thung a, hei vang hian sawrkar laipui lamah ASF avanga Vawk suat te zangnadawmna hi dil a ni leh bawk. Kum 2022-a ASF avanga Vawk suat te zangnadawmna sawrkar in za zela 25 a pek pawh nikum khan sem a nih thu leh kum 2023-a Vawk suat te zangnadawmna pawh hetiang bawk hian pek leh tum a nih thu an sawi a, Serchhip District-ah erawh tanpuina pek tur an awm loh thu an sawi bawk.

Serchhip-a AH&Vety Department hotute chuan Serchhip District mipuite mamawh ang Vawk chu Serchhip District-ah hian a awm anga ngaih theih a ni tih sawiin, hri leng avang hian Vawk thi leh suat tam tak awm mah se Krismas leh Kumthar lawmna-a ruai siam ah harsatna a awm lutuk lo nia an hriat thu an sawi a. Chutihrual erawh chuan ASF hri hian Mizoram ala awm chilh mek avangin fimkhur zel erawh ala tul thu an sawi bawk a ni.