Sawrkar hnathawkte mipui tana dawr theihna hun tam zawk nei tur leh dawr nuam zawk ni tura beisei an ni
Chief Minister Lalduhoma chuan Aikal lak an tihtawp thu sawiin, aikal lo la ru palh an awm em tih an enthla zel tih sawi a. Sawrkar hnathawkte chu mipui tana dawr theihna hun tam zawk nei tur leh dawr nuam zawk ni turin an beisei thu a sawi bawk.
Nimin khan Aizawl-a Secretariat Conference Hall-ah Disaster Management & Rehabilitation (DM&R) leh Department of Personnel & Administrative Reforms (DP&AR) te Review Meeting neihpuiin Chief Minister chuan Review Meeting hi tum nga (5) buatsaihna a nih thu leh Department dang pawh neihpui zel a tum thu sawiin, “Review Meeting hi thil dik lo zawng tura buatsaih ka ni lova, harsatna sutkian dan leh thawhho dan tha kan zawnna a ni. Zalen takin engkim kan sawi anga, minute fel takin kan siam ang a, nakin-ah kan la rawn umzui leh dawn a ni,” a ti a. Aikal lak chungchang ah aikal lak an tihtawp thu leh lo la awm ru palh an awm em tih pawh an enthla zel tih sawiin, Officer pension tawh ten sawrkar facility an lo la kawl reng em tih te pawh an dap zel tih a sawi a. “Hun vawn dik kan duh a, khauh zawkin kan kal a, kan zawm tha tlang hle. Kan kengkawh zui zel dawn,” tiin Sawrkar hnathawkte chu mipui tana dawr theihna hun tam zawk nei tur leh dawr nuam zawk ni turin an beisei thu a sawi a. “e-office hi uar chhoh zel kan duh a, a theih chen chenah in lo ngaihven tlang dawn nia,” a ti a. Department tin te chu Service Review Committee din vek turin an tih thu Chief Minister chuan sawiin, “Sawrkar hnathawk, an hnaa chhawr tlak si loh te dapchhuak a, Special Pension Scheme tha tak nena chawlhtir a, an aia midang tha zawk, chhawr tlak ngei lak tha kan ti,” a ti bawk.
Department ten Project inang tak tak an thehlut thin tih Chief Minister chuan sawi bawkin, hetianga inhre tawn lova hma an lak hian sum leh pai, hun leh tha tul lovah a luangral thei tih a sawi a, “Chuvang chuan kan Project siam reng reng Planning Department lama thehluh hmasak zel tur a ni. Annin an zirchian hnuah chauh Project kalpui thin tur a ni,” a ti a, hetiang tho hian CSR pawh CSR Cell-in hriatpui zel se an duh thu a sawi a, GST registration nei lo hnenah eng contract hna mah pek loh tur a nih thu leh Contract diltu chuan GST Registration an nei ngei tur a ni, a ti.
He thutkhawm ah hian DM&R leh DP&AR changtu Minister K. Sapdanga pawhin nikum kumtir lam atangin leilung chhiatna chi hrang hrangin Mizoram a chim thu sawiin, hna hman-hmawhthlak a nih thin avangin Fund an neih ang anga hma an lak nghal thin thu leh tun thlengin an la umzui thu a sawi a. DP&AR chu sawrkar marphu lai tak ni-ah an inngai tih sawiin, “Kalphung thar atana hmanraw pawimawh lai ber kan ni. Kan kal dan turah pawh thurawn tha dawng turin kan inhawng zau hle a ni,” a ti bawk.
Nimin-a Review Meeting-ah hian heng Department te kalphung leh hma an lakna hrang hrangte tarlan niin chhiatna thleng chi hrang hranga chhawmdawlna hna thawhna tura sum an hmuh dan leh an hman dan te thlirho a ni a, SDRF (2024-25) atangin nikum khan African Swine Fever (ASF) tuartute chhawmdawl nan cheng nuai 480 dah a nih thu tarlan niin State Emergency Operation Centre chu engtik lai pawha biak theih niin State-ah 1070, District-ah 1077 leh Emergency Response Support System-ah 112 a nih thu tarlan a ni.
DP&AR-ah Wing panga awmin, Mipui Aw online kaltlangin lungawilohna 378 dawn a ni tawh a, heng zinga 319 chu chinfels ak an ni a. The Mizoram Right to Public Services Act hnuaia Service pekchhuah zat chu 144 atangin 197-ah tihpun a ni a. Hei hi CM's 100 points programme a tel a ni a. DP&AR (GG&TW) chuan nakum Financial Year ralhmaa service 300 tala tihpun dan dap an tum a, e-office kalpui turin tunah hian hmalak mek a ni bawk.