Kolasib District MJA ten Annual Conference an hmang

Mizoram Journalists Association (MJA), Kolasib District-te chuan nimin khan Kolasib Press Club-ah Annual Conference an hmang.

Kolasib MJA Annual Conference hi chawhma lamah an President Andrew Vanlalauva chuan kaihruaiin Kolasib District chhunga National Highway siamthat mek leh Four Lane kawngpui siam chungchangah chak zawka hma lak a nih theih nan a tul angin bawhzui nise tih te; Kolasib District chhunga ramri duty Police-te an dinhmun zirchiang tura a hmuna tlawh nise tih te; Kolasib Press Club sak mek chu kumin a hawn hman ngei turin chak taka hmalak nise tih te leh kumin chhungin fehchhuahna hun neih ngei nise tihte an rel a ni.

Chawhnu lamah Vice President C. Zomuanpuia'n inkhawm kaihruaiin SDO (Sadar) H. Lalramliana Kolasib chuan khuallian niin hun a hmanpui a, Journalist hna chu hna zalen, hna nuam leh pawimawh tak si a nih thu sawiin, “Journalist te in taimak a ngai a, finfiah ngam news in puanchhuah a pawimawh a ni,” a ti a. He hunah hian 'Changing Nature of the Press' tih thupui chu an zirho nghal bawk a ni.