NH. 306 leh 06 siam mek chungchang sawiho

Nimin khan Kolasib-ah NH 306 leh 06 thawmthat hnathawh kal mek leh chak zawka hna a kal theih dan tur chungchang sawiho a ni.

He sawihona Kolasib DC Conference Hall-a neih ah hian Kolasib bialtu MLA leh Assembly Deputy Speaker Lalfamkima chuan National Highway 306 leh 06 siam hna thawh mek chu tha tak a siam a pawimawh thu leh chak taka kalpui a tul thu a sawi a. Thal lai a kawngpui siam zawh a nih theih nan theihtawp in Contractor-te leh NHIDCL hotute chu a nawr a. National Highway siam hna an thawh kawngah harsatna an neihte Mizoram Sawrkar hnenah a rang lam thlen zel turin a chah bawk a. He huna kalkhawmte chu hnathawh hun (working season) reilote chhunga chak taka hma lak a nih thei nan an ngaihtuahna seng turin a sawm bawk a ni.

He hunah hian Kolasib Deputy Commissioner Robert. C. Lalhmangaiha chuan an thutkhawm chhan sawifiahin National Highway 306 leh 06 siam chungchangah vawi tam tak thutkhawm neih a nih tawh thu leh tun Working Season chhunga kawngpui siam hna chu zawh hman a nih loh chuan Mizoram mipuite’n NHIDCL leh an hnuaia Contractor te, PWD (National Highway) te chu an dem hle dawn tih a sawi a. National Highway 306 leh 06 siam hna hi a hun taka peihfel a nih theih nan leh Fur khaw chhia in a nan hma ngeiin a thawktute chuan chak taka hma la turin a chah a. A tul anga thawktu tam zawk leh hmanrua tam zawk pawh la belh tura chahin, zawhfel hun tura an in tiamna March ni 31, 2025 chhunga an zawh hman theih nan theihtawp chhuah turin a chah bawk a ni.