VC leh LC Inthlanpui-a hman tur Electoral Roll naktuk-ah tarchhuah a ni dawn

Thla thar February ni 19-a Village Council leh Local Council term tawp hma a inthlang thei tura inbuatsaihna-ah VC leh LC Electoral roll chu naktuk, January 8, 2025 (Nilaini) hian tihchhuah a ni dawn.

State Election Commission hotute sawi danin VC leh LC inthlang thei tur hian sawrkarin an hun pawhtawi a puan hma atang tawh khan Electoral Roll hi buatsaih chhoh a ni tawh a. Tunah hian a hmawr bawk tep tawhin Nilaini khian inthlanna atana hman theih turin Final Electoral Roll chu tihchhuah a ni dawn a ni. Electoral Roll peihfel a nih hnu hian VC leh LC inthlan hi puan thuai a nih rin a ni. VC inthlanah hian Autonomous District Council huamchhunga VC-te tel lovin Mizoram pumah inthlan buatsaih a ni dawn a. VC leh LC inthlan inbuatsaih dan leh an inpuahchah tawh chin chungchangah State Election Commission chuan District tin Bawrhsap te biakhmuhtheih hmangin a lo sawipui tawh bawk a ni.

Tarlan tawh thin angin tuna VC dinglai te hun hi kumin August thla chawhnu thleng a nih lai-in sawrkar chuan a pawhtawi sak a, February ni 19-a an hun hi tawp turin November ni 20 khan Local Administration Department (LAD) chuan hriattirna a chhuah a. Thla 6 zeta VC hun pawh tawi hi eptu party-te leh All Mizoram Village Council Association (AMVCA) chuan an dodal a, AMVCA phei chuan Gauhati High Court-ah khinna an thehlut a ni. 

Tunhnaia VC thar siamte tiam lovin kum 2020-a VC inthlanah khan VC 533 a awm a, tunah chuan siam tharte nen a vai a inthlan buatsaih a ni dawn a ni. Hei bakah hian AMC leh LMC hnuaia Local Council hun kal mek pawhtawi chungchang hriattirna hi thla hlui mai khan UD&PA department chuan a tichhuak ve leh a ni.