Human Metapneumovirus (HMPV) chungchangah mipuite chi-ai lo turin sawrkar in a chah

Health Department chuan tunlai natna leng thar Human Metapneumovirus (HMPV) chungchangah chi-ai lo turin mipuite chu a chah.

HMPV chungchangah hian niminpiah khan Health Minister Lalrinpuii hovin Health Department hotute chu thukhawmin India leh Mizoram dinhmun an thlirho bakah ruahmanna te an siam a, Health Minister Chairman-na hnuaiah he natna chungchang viltu tur 'Core Committee on HMPV' din nghal niin State Level-ah leh District tinah Rapid Response Team te pawh siam a ni bawk. He hri leng chungchanga thuchhuah an siamah Health Department chuan tun tum China a hrileng HMPV hi tlang hrileng chi khat a nih thu leh kum danga leng thin ang tho a ni tih tarlangin, he natna hrik hi China chauh ni lo, khawvel pumah kumtin lengin, kumtluan a leng a nih thu leh hritlang satliah angin a langchhuak thin tih an sawi a. IDSP kaltlangin he natna hi uluk takin an vil reng thu leh Mizoram-ah pawh Zoram Medical College (ZMC)-ah test theih tura ruahmanna siam a ni tih an sawi a ni.

Health Department thuchhuah chuan Health system leh Surveillance network in uluk leh fimkhur taka vil reng a nih thu sawiin, hrileng darh palh thutah pawh hma la vat thei turin Health Department chu a inring reng tih an sawi a. Sawrkar damdawi In leh Private Hospital zawng zawng ten IHIP report hmanga nitin hetiang ang case (ILI, SARI etc.) an neih leh natna dang report thin turte uluk leh kim taka report turin sawrkar chuan a hriattir bakah Pneumonia natna thleng thei laka control programme/SAANS campaign chu Mizoram District zawng zawngah kalpui mek niin, he Campaign hi hlawhtling taka kalpui a nih theih nan thawktute leh mipuiten theihtawp chhuah turin Health Department chuan mitinte a ngen bawk a. Mipuite pawh hetiang natna rinhlelh kai an awm a nih chuan, mahni awmna atanga hnai ber Sub-Centre/Health and Wellness Center emaw, damdawi In-ah in-report vat turin an a chah a. He hritlang natna hi tlang hrileng chikhat a ni tih sawiin, kum danga leng thin ang tho a nih avangin Sawrkar chuan lo chi-ai mai lo turin mipuite a chah a ni.

Tlang hrileng laka inven dan mipuite hriattur pawh sawrkar thuchhuah chuan tarlangin, uluk taka sahbawn nen kut sil thin tur (second 20 chhung sahbawn a nuai tur) a nih thu te; Kut fai lovin Mit, Hnar leh Ka khawih loh tur a nih thu te; Hritlang damlote in awm hnaih lutuk loh tura nih thu te; Khuh leh hahchhiau in ka leh hnar hup tur a nih thu te; Disinfectants hmanga vawnban te hrukfai thin tur a nih thu leh Hritlan lai chuan Ina tawmim nise tih te an tarlang a ni.