Dr. Vanlalthlana hovin inhlantharna hun hmang

Nimin khan Minister Dr. Vanlalthlana hovin a Pisa-ah kum 2025 atana inhlan tharna leh infuih tharna hun hman a ni.

Nimin-a he hun hman hi Minister Dr. Vanlalthlana chuan kaihruaiin a Department enkawl- School Education, Higher & Technical Education, Information & Public Relations leh Information & Communication Technology Department a Officer te an tel a, Dr. Vanlalthlana chuan kum kalta-a Department Official-te nen thawhhona tha tak an neih avangin lawmthu a sawi a. Kumthar a nih angin rilru thar pu chunga ram leh hnam tana theihtawp a thawk chhunzawm zel turin a Department enkawl a thawktute chu a fuih a. Sawrkar chu thawhhona leh inrintawnna avanga kal thei a ni tih sawiin, inpawh tak leh inlungrual taka thawk theuh turin a chah a. Sawrkar chu mipuite ta a nih angin sawrkar hnathawk chu mipui rawngbawltu an ni a, an hnathawhna ah an rawngbawlsak mipuite chu dah pawimawh hmasak nachang hre zel turin a chah bawk.

He hunah hian Rev. R. Laltlankima, Superintendent, Aizawl East District, UPC (NEI) chuan hunserh hmangin huaisen tur chuan mi dik nih a pawimawh thu a sawi a, ram hmasawn nan sawrkar hnathawkte chu dikna tan ngam mi huaisen an nih a tul thu a sawi bawk a ni.