END in nikum chhungin Zu leh damdawi man tam

Excise & Narcotics Department chuan kum kalta 2024 chhung khan Rakzu litre sing ruk chuang manin Heroin kg. 46 chuang an man bawk.

Excise & Narcotics Department hian nimin khan Commissionerate of Excise & Narcotics Building-a Conference Hall-ah Kumthar Inhlantharna hun hmangin Commissioner of Excise & Narcotics Z. Lalhmangaiha chuan he hun hi a hmanpui a, Mizoram Sawrkarin ruihhlo do a ngai pawi-mawh tih sawiin, District office thar pathum hawn a ni a, thawktu indaihlohna te theih ang anga hnawhkhah a nih thu te, Department thuamchakna tur leh mamawh tam tak ngaihtuahsak zel a nih avangin Sawrkar chungah lawmthu a sawi a. An Minister hova hma an lakna ah a tunhmaa Aizawl-a zu zawrhna hmun, ‘A sen chi Lane’ tia hriat thin, tuna ‘Venbuk Lane’ tia thlak tak hmuna Zu leh a zuartute tihbo a ni te te chu lawmawm a tih thu a sawi bawk a ni.

He huna tarlan a nih danin Excise & Narcotics Department hian kum kalta 2024 chhung khan Rakzu litre 67,911.515 awmin Zu Bilhlai Tin 1,26,337 an man a, Dawidim kg. 181.577 manin Zu siamna Bel 2,933 an man bawk. Sapzu (IMFL) pawh um puitling 16,559 manin a chanve um (375ml) pawh 5,908 an man a, 275ml chi um 127 leh 180ml um 11,660 an man bawk. Beer pawh um 177 manin Can beer 36,500 an man a, BEDC pawh litre 4,119.840 an man bawk.

Nikum chhung vek khan damdawi pawh thahnem tak an man bawk a, Heroin kg.48.566 zet manin Ganja kg. 586.636 an man bawk a, ruihna atana hman chi khuh damdawi bur 6,366 manin Alprazolam tablet 7,523; Nitrazepam tablet 6,129; Diazepam tablet 2,580 leh Tramadol tablet 168 an man a, Methamphetamine pawh kg. 138.817 zet an man bawk a. Heng zu leh ruihhlo kaihhnawih ah hian lirthei 93 manin Dan bawhchhia mi 7,309 an man bawk a ni.