February 20-ah Sawhthing lei tan a ni dawn

Thla thar February 20 atangin Sawrkar in Sawhthing a lei tan dawn tih Agriculture Minister PC. Vanlalruata chuan a sawi.

Nimin-a a Pisa-a thuthar thehdarhtute a kawmna ah Agriculture Minister chuan Agricultural Market Assurance Schemes hnuaia sawrkarin rate tur a tihchhuah tawh angin Sawhthing chu kg-ah Rs. 50 a lei a ni dawn tih a sawi a. Mizoram khaw hrang hrangah Society 675 a awm tawh thu sawiin, heng Society te hian District hrang hranga sawrkarin a ruahman Sawhthing lakkhawma leina tur, Secondary Collection Centre 54-ah an phur khawm dawn tih a sawi a, District tina District Agriculture Marketing Committee in lo buaipuiin kumin hian Sawhthing quintal nuai 14 vel thar beisei a ni a, a chi tur tel lovin quintal nuai 10 vel thar tura chhut a ni.

Mizoram Agriculture Marketing Board Chairman ni bawk PC. Vanlalruata chuan tun dinhmunah India ram hmun dangah Sawhthing lei tur a tam thu sawiin, a bik takin India ram chhim lamah an thar nasat thu te, India ram puma Sawhthing rate a la san loh thu te, kg-ah Rs. 20 - 25 vel niin Sawhthing leitu ten Mizoram lam la hawi hman loin India ram hmun dangah Sawhthing an la lei mek thu a sawi a. Market-ah a la tlawm avangin sawrkar chuan Mizoram a Sawhthing chinte Rs. 50 aia tlawma lei emaw, hralh emaw a nih lohna turin Rs. 50 chu a hniam lama ven nan kut hnathawktute hnen atangin an lei dawn tih a sawi a, Mipui lamah zawhna a tam tan thu sawiin, thlai tharte hi rate nei an nih avangin kuthnathawktute chu lo nghak hram turin a ngen a, mimalin hemi hmaa a aia tlawm emaw a hralhna tur an hmuh chuan an duhthlanna a nih thu a sawi bawk.

Minister chuan thlai dangah pawh hmalak mek a nih thu sawiin, Buhhum thar a tam theih nan kumhlui December ni 17 atangin Pangbalkawn-ah buhhum kg-ah Rs. 30 a lei tan a nih thu te, Hmarcha kg-ah Rs. 350 aia to in hralh mek a nih thu leh Hmunphiah hralhna tur pawh tihfel a nih thu sawiin, panel buyer mi 7 thlan an nih thu leh March atangin a leitute hnenah hralh tan a nih dawn thu a sawi bawk.