Kalphung thar mipui Sawrkar a lo dingchho ta, kan tum ram hi kan la thleng ngei dawn - ZPM President

Zonuna Kawlni (LENKAWL) • January 14, 2025 • Comments • Mizoram

ZPM President Lalliansawta chuan Mizoram-ah Kalphung thar mipui Sawrkar a lo dingchho ta tih sawiin, “Thawk lehkhatah kan duh leh beisei ang zawng zawng hi thleng vek thei lo mah se, Pathian in min hruai zel anga, kan tum ram hi kan la thleng ngei dawn a ni,” a ti.

Kumin 2025 atana ZPM Party in Aizawl-a an Party Office hawnna Inkhawm nimin-a neih ah ZPM President Lalliansawta chuan tunhma atangin Mizote eizawnna ber chu thlawhma neih a ni ber tih sawiin, Mautam leh rambuai in min nan hnuah hnathawk thei thalai leh Pa hovin ramhnuai leh Jail ah hun an hman angaih avangin kan economy a tlahniam duai duai mai niin a sawi a. “Hun a lo inher a, UT ah kan ram chu hlankai a lo ni ta a, Central Sawrkar atanga sum lo kal kan han inchuh leh ta kha a ni a, kan ram tana Project tha leh rotling tur ngaihtuahna kan nei pha meuh lo a, mahni pumpuarna leh tangma hai duhnain rilru a luah hneh hle a nih kha. State kan nih hnuah pawh chu rilru chu kan la paih hleithei lova, Chutianga hun rei tak kan hman hnuah Kalphung thar, mipui Sawrkar a lo dingchho ta a, he party ah hian mipuiten beiseina thar neiin an rilru tihharhin a awm chho ta mek a ni,” a ti.

ZPM President chuan Kalphung thar mipui Sawrkar kal dan thlir hian kan ram hi a la dingchhuak ve ngei dawn nia a lan thu sawiin, “Hmasawnna chhenfakawm sawi tur kan hnutchhiah chho mek a ni. Thawk lehkhatah kan duh leh beisei ang zawng zawng hi thleng vek thei lo mah se, Pathian in min hruai zel anga, kan tum ram hi kan la thleng ngei dawn a ni. Chuvangin kan ram tana thawktu zawng zawngten thahnem ngai taka in thiamna leh finna hmang zel turin ka sawm che u a ni,” a ti a. “Kalphung thar rilru pu chungin, hlemhletna leh mahni tanghma haina sirah hnawl zelin, Kalphung thar hian hmasawnna thar kan ram tan rawn thlen chho zel sela, kan tu leh fa, thangthar lo la awm zel turte tan ram siam hna i thawk zel ang u,” a ti bawk.

Nimin-a ZPM in Party Office hawnna hun an hman hi Vice President W. Chhuanawma MLA chuan kaihruaiin ZPM Hla thar ‘Vul zel ang che’ tih chu Chief Minister Lalduhoma chuan tlangzarhin an Party zawm thar te a lawmlut nghal bawk a ni.